Ошибка
 
 
Қоғам
АЛҒАШ РЕТ УНИВЕРСИТЕТ ЖАНЫНАН БИЗНЕС МЕКТЕБІ АШЫЛДЫ Печать
28.03.2019 10:15

Шымкент қаласында «Жастар жылы» жақсы жаңалықтармен басталды. Атап айтсақ, қаламызда алғаш рет университет жанынан жас кәсіпкерлерге арналған бизнес мектебі ашылды. Жобаны ұйымдастырушылар – «Шымкент» әлеуметтік-кәсіпкерлік корпорациясы, «UX group» компаниясыжәне «Silkway» халықаралық университеті. Аталған жоғарғы оқу орнында «Shymkent Business School» бизнес мектебінің арнайы таныстырылымы өтті.


Бұл стартап-мектеп дәрістеріне болашағын бизнеспен байланыстырғысы келетін студенттер, университет түлектері, жалпы 18-35 жас аралығындағы жастар, жас кәсіпкерлер қатыса алады. Оқу мерзімі – 15 күн. Курста білікті бизнес жаттықтырушылар дәріс беріп, ал арнайы дайындалған бағдарламада жас кәсіпкерлер үшін қажетті ақпараттар қамтылады. Нәтижесінде, бизнес мектеп түлектері тегін білім алып, сертификат иеленіп шығады. Тағы бір тиімді тұсы – ең үздік идеялардың авторы атанған түлектерге «Шымкент» әлеуметтік-кәсіпкерлік корпорациясы арқылы қаржыландыру қарастырылған. Қазіргі таңда, оқуға жүзден астам талапкердің өтініштері тіркеліпті. Мектептің басты ерекшелігі – электронды коммерция негіздерін үйрету.

«Shymkent Business School» мектебінің ашылу салтанатында аталған университет студенттері өз бизнес жобаларының таныстырылымдарын жасады. Салтанатқа қатысқан «Silkway» халықаралық университетінің ректоры И.Е.Ефимова, «Шымкент» әлеуметтік-кәсіпкерлік корпорациясының директоры Р.А.Аюпов, Шымкент қаласының балалар, отбасы және жастар ісі жөніндегі басқарма басшысы Ж.Т.Қалтаев, Шымкент қаласының «Кәсіпкерлер палатасының» директоры А.Абубакиров мырзалар құттықтау сөз сөйлеп, жас кәсіпкер-студенттерге сәттілік тіледі.

Елбасы Н.Ә.Назарбаевтың 2019 жылы Жолдауында жарияланған «Жастар жылы» аясында жүзеге асырылып отырған бұл жобаның көтерген жүгі орасан. Яғни, студенттер мен жастарға кәсіпкерлікпен айналысу негіздерін оқытып, іс жүзінде сүйемелдейтін мектептен көптеген өз саласының маман-кәсіпкерлері шығары сөзсіз.

"Қызмет" ақпарат

 
«АДВОКАТТЫҚ ҚЫЗМЕТ ЖӘНЕ ЗАҢ КӨМЕГІ ТУРАЛЫ» Печать
17.10.2018 14:46

Адвокаттық қызмет – жеке тұлғалардың құқықтарын, бостандықтары мен заңды мүдделерін, сондай-ақ заңды тұлғалардың құқықтары мен заңды мүдделерін қорғау және оларды іске асыруға жәрдемдесу мақсатында адвокаттар кәсіби негізде көрсететін білікті заң көмегі.

Қазіргі таңда елімізде білікті заң көмегін көрсету жүйесін дамытуға бағытталған шаралар қолға алынып жатыр. Ол Қазақстан Республикасының Әділет Министрлігімен әзірленген «Адвокаттық қызмет және заң көмегін көрсету туралы» Заңы жобасы.

Жалпы алғанда, аталған «Адвокаттық қызмет және заң көмегін көрсету туралы» Заң жобасы 4 бөлімнен тұрады.

Бірінші бөлім – «жалпы ережелер» заң көмегін көрсететін субъектілері мен оны көрсетілуінің жалпы шарттарын анықтайтын болады. Бұл бөлімнің нормалары құқықтық көмек көрсету қағидаттарын, құқықтық көмек көрсетудің түрлері мен нысандарын, заң көмегін көрсететін субъектілердің құқықтық жағдайын, заң көмегі саласында Үкіметтің және уәкілетті органның құзыретін және т.б. анықтайтын болады.

Екінші бөлімде – «Мемлекет кепілдік берген заң көмегінде» мемлекет кепілдік берген заң көмегінің көрсетілуінің жалпы шарттары мен тәртібін реттейтін болады.

Үшінші бөлім – «Адвокаттық қызмет» – адвокаттардың заң көмегін көрсететін негізгі субъектілер ретінде құқықтық жағдайын (құқықтары мен міндеттері, кепілдемелері, қызметін сақтандыру); адвокаттардың құқықтық мәртебесін алуға негіздемелер (үміткерге қойылатын талаптар, тағылымдама, аттестаттау, лицензиялау, мүшелік шарттары); адвокаттық қызметтің ұйымдастыру нысандары, аумақтық адвокаттар алқасының басқару органдары, олардың өкілеттіліктеріне, адвокаттар алқасы мүшелерінің қызметіне, басқару органдарына бақылау жүргізу, тәртіптік жауапкершілікке тарту, адвокаттар алқасы мүшелерінің адвокаттық қауымдастығының басқару органдарының іс-әрекетіне (әрекетсіздігіне) шағымдану нормаларын көздейтін болады.

Төртінші бөлімде – заң кеңесшілерінің құқықтық жағдайы, заң кеңесшілерінің өзін-өзі реттеу моделі, заң кеңесшілерінің кәсіптік жауапкершілігін сақтандырудың тәртібі және шарты; заң кеңесшілерінің палаталарына мемлекеттік бақылау және қадағалау жүргізу шегі және т.б. анықталатын болады.

Е. МҰХАН,

Шымкент қаласы Әділет департаменті Абай аудандық әділет басқармасының инспектор, іс-қағаздарын жүргізушісі.

 
ҚҰРМЕТТІ АСТАНА ҚАЛАСЫНЫҢ ТҰРҒЫНДАРЫ МЕН ҚОНАҚТАРЫ! Печать
19.06.2018 13:06

БҮГІН, кешкі сағат 19:00-де "Астана" концерт залында өтетін "Асқақтай бер, Астана!" мерекелік гала-концертіне шақырамыз!

Концертке Оңтүстіктен шыққан эстрада жұлдызы, ҚР еңбек сіңірген қайраткері

Алтынай Жорабаева және ҚР Халық әртісі Нұржамал Үсенбаева, ҚР Мәдениет қайраткерлері Үрәлхан Сейілбекова, Марат Оразметов пен ҚР еңбек сіңірген әртісі Сәбираш Әбдірайымова және Халықаралық байқаулардың лауреаттары Карина Нажмеддинова, Мөлдір Исаева, Жадыра Абдуллаева, Нұрқанат Тапиев, Аян Төлеген, Нематилло Зкруллаев, Бекзат Тұрғынбек, Ақмарал Биназарова сынды сахна саңлақтары қатысады.

Елбасының «Болашаққа бағдар: рухани жаңғыру» бағдарламалық мақаласы мен Астана қаласының 20 жылдығына орай «Ән мен күй әлдилейді Астананы» атты Оңтүстік Қазақстан облысының Астанадағы күндері аясында бастау алған мерекелік концертке келіңіздер, көріңіздер!

 
ЛАТЫН ӘЛІПБИІНЕ КӨШУ – БОЛАШАҒЫМЫЗ ҮШІН МАҢЫЗДЫ Печать
19.06.2018 13:01

Латын әліпбиіне ауысу – еліміз үшін маңызды шешімдердің бірі. Латын әліпбиіне көшудің алғашқы қадамдары бұдан қаншама жыл бұрын жасалып еді.Оған бүкіл ел куә. Бұл бастама бірақ күнде қолға алынған жоқ, елімізде бұл жобаға деген нақты қадамды Елбасымыз Нұрсұлтан Назарбаев 2012 жылғы желтоқсан айында жария еткен «Қазақстан-2050» Стратегиясында «2025 жылдан бастап латын әліпбиіне көшуге кірісуіміз керек» деп мәлімдеген болатын. Менің ойымша, бұл – дұрыс қадам әрі еліміз үшін үдемелі ілгерілеушіліктің қадамы деп білемін. Міне, осы сәттен бастап кешегі күнге дейін, нақтырақ айтсақ Қазақстан Республикасы Президентінің 2017 жылғы 26 қазандағы № 569 Жарлығымен латын графикасына негізделген қазақ тілі бекітілген күнге дейін көптеген зерттеулер, зерделеулер іске асты. Осы ауқымды жұмыстың арқасында қазақ тілінің латын әліпбиіне негізделген өз алфавиті қабылданды.

Мемлекет басшысы Қаулыда бекітілген латын әліпбиіне 2025 жылға дейін кезең-кезеңімен көшуді бұйырды. Оның орындалуын Қазақстан Республикасы Президентінің Әкімшілігі тікелей бақылап, өз қолдарына алғаны белгілі. Бүгінгі таңда қабылданған латын әліпбиінде 32 әріп бар. Қазақтың төл дыбыстары апостроф арқылы белгіленген.

Тарихқа кішкене шегініс жасасақ біздің еліміздің тарихында ХХ ғасырдың бас жақтарында қазақ зиялыларының қолдауымен ортақ түрік тілдес халықтардың әліпбиі негізінде осы латын әліпбиі алынған болатын. 1929 жылы 24 қаңтарда Қазақстан Орталық кеңес комитеті ІV cессиясында «Латын әрпі негізінде құрылған жаңа қазақ әліпбиі Қазақстанда мемлекет әліпбиі деп саналсын» деген қаулы қабылдады. Осы қаулыдан кейін 1931 жылдың 1 қазанынан әрі қарай барлық мекеме, кооперативтер, түрлі кәсіпорындар мен ұйымдар істерін жаңа әліпбиге көшіруге тиіс деп табылды. Жаңа әліпбиге көшуге әзірлік жүргізілді. Дегенмен бұл әліпбиді қазақ қоғамы көп уақыт пайдалана алмады. Міне, бұл бізге таңсық дүние емес, сондықтан бүгінгі латын әліпбиіне жасаған қадамымыз өте керекті де, нақты қажетті кезінде қабылданған шешім.

Бүгінгі күнге оралсақ, заман талабы латын әліпбиі. Бүгінгі қоғамдағы кез-келген жас буын өкілдері бұл әріпті таниды. Сондықтан болашақта алып кетулері, үйренулері өте оңай, әрі тез болады. Бұл жағынан қиындық тумауы керек. Себебі, мектеп қабырғасында білім алушылар ағылшын тілін оқып, латын әріптерін онсыз да үйреніп жатыр. Сондықтан, жас буын үшін ешқандай қиындық, кедергілер болмақ емес. Сондықтан да, Елбасымыздың бұл бастамасы ел ертеңі үшін болашаққа батыл қадам жасап, елімізді төрткүл дүниеге танытып келе жатқан дер кезінде қозғалған, ұлт тірегі-ана тіліміздің болашағы үшін жасалған ғылыми мәнді шара деп білемін. Мұны қазіргі кирилл-қазақ әліпбиіне немесе орыс тіліне теріс қарау деп емес, қайта қазіргі әліпбиіміз бен жазуымыздағы халықтың өз еркімен қалап алмаған, кешегі кеудемсоқ жүйенің өктем саясатының әмірімен күшпен таңылған кейбір кірме әріптерден арылып, таза қазақ әліпбиін жасау бағытындағы игілікті қадам деп және ана тіліміздің болашағын ойлап, қолданыс аясының одан әрі кеңейе түсуіне мүмкіндік жасап, тіліміздің ішкі табиғатына әліпбиіміз арқылы жазудың айтуға жасап келе жатқан қиянатын болдырмай, қазақы айтылым (орфоэпия) мен жазылым (орфография) талаптарын жүйеге түсіру деп түсіну керек.

Бекболат Тілеуханов ағамыз латын әліпбиі жайлы айтқан бір сөзінде: «Латын әліпбиіне көшу Астана салғаннан қиын емес, ағайын, сондықтан бұл қадамнан шошымайық» деген болатын. Расында да аса қиын дүние болмауы керек. Мейлі, кез-келген жаңа бастаманың басында өзіне жарасатын қиындықтар туады ғой, алайда біз, біздің мемлекетіміз оларды шеше алатын деңгейде. Сондықтан болашақта баламыз өзге елдің баласымен білімі мен ұстанымы тең болсын десек, латын әліпбиінен шошымауымыз керек.

Статистикаға сүйенсек жер бетінде латын әліпбиі барлық салада қолданылатыны байқалады. Барлық дәрі-дәрмек атаулары, математика, физика, химия формулалары, көптеген терминдер, мамандықтарға қатысты ғылыми әдебиеттер латын әліпбиімен байланысты екенін байқауға болады. Латын графикасын қолданатын барлық елдердің әліпбиіндегі әріп саны тілдегі фонемалар санынан әлде қайда аз болуы да оның жетістігі болып табылады. Бұл латын әліпбиіне біздің көршілес Әзірбайжан, Өзбекстан секілді елдер қаншама жыл бұрын ауысып кеткен. Олардың бізден бұрын ауысуының тағы бір пайдасы, олардың тәжірибесінде кездескен кейбір қиындықтардың алдын алып, нақты қадаммен бара аламыз.

Латын әліпбиі қазақ халқының тіл шұрайлылығын бұрынғыдан да паш ете алатын әліпби екеніне күмәнім жоқ. Және біз осы латын графикасы арқылы талай-талай биіктерді бағындырып, өзіміз аңсаған Мәңгілік елге жететініміз анық.

Латын әліпбиі жастарымыз үшін, біздің болашақ ұрпағымыздың әлем елдерінен алатын үлесін көбейту үшін ең керекті дүние. Сондықтан латын әліпбиіне көшу – болашағымыз үшін маңызды. Мүмкіндігінше бұл бастамаға әрқайсысымыз қолдау көрсетіп, ауысу процесінің жеңілдеуіне үлес қосуымыз тиіс.

Кауменова Эльмира Шахабоддиновна,

Е.Молдабаев атындағы ЖОМ,

қазақ тілі мен әдебиет пәнінің мұғалімі,

Арыс қаласы.

 
Бет 8 , барлығы 77
 
Барлық құқықтар қорғалған.
"Қызмет" интернет басылымы.