Ошибка
 
 
Сұхбат
«Әрбір басшы қызметшілердің істеген еңбегін бағалайды» Печать
19.07.2019 18:40

Ғабит МӘУЛЕНҚҰЛОВ, Шымкент қаласы Әл-Фараби ауданының әкімі:

«Әрбір басшы қызметшілердің істеген еңбегін бағалайды»

Бүгінгі кейіпкеріміз мемлекеттік қызметші деп білімді де білікті, қарапайым әрі адал, ашықтық пен жариялылықты ұран еткен азаматты атайды. Одан бөлек, ол әрбір қызметшіні өзімен тең көріп, басшылық және орындаушы құрам деп бөлуді ұнатпайды. Осы орайда олардың ой-пікірін тыңдап, жұмысқа ынталандырудың жолын біледі. Әңгімемізге арқау етіп отырған кісі – Шымкент қаласы Әл-Фараби ауданының әкімі Ғабит Мәуленқұлов. Міне, дәл осындай мемлекеттік қызметшінің нағыз кескін-келбетін бойына сіңірген басшымен сұхбаттасып, мемлекеттік қызметшінің қыр-сыры мен атқаратын негізгі жұмыстарына қанық болдық.


– Ғабит Патшаханұлы, қала тынысымен етене таныссыз. Себебі, бұған дейін Шымкент қаласының Қаратау ауданы әкімі және қала әкімінің орынбасары болдыңыз. Ал бүгінде Әл-Фараби ауданының әкімісіз. Бұл басшылыққа келгенізге де жыл толып қалыпты. Осы ретте мұнда алғаш бастаған қадам мен атқарған істер жайында және алдағы уақытта күнтәртібінде тұрған жоспарларыңызбен бөліссеңіз...

– Шымкент қаласының Қаратау ауданы әкімі болып тағайындалғанда, бірінші, елдімекендермен танысу жалпы Қаратау ауданында 24 елдімекеннен тұрады, оның басым бөлігі Ордабасы, Төле би, Сайрам аудандарынан қосылған. Ауданның ең басты мәселесі – ол инфрақұрылым жүйелері, оның ішінде: ауыз су, сапалы электр жарығымен қамтамасыз ету, газ, жол салу. Халықтың сұранысына байланысты, біз өзіміздің ұсыныстарымызды тиісті басқармаларға енгізе отырып, бірқатар басқармалармен бірлесіп 8 елдімекенге жобалық сметалық құжаттары жасалып, қазіргі таңда ел игілігіне пайдаланылуда.

Қала әкімдігінде жұмыс жасағанда инвестиция тарту мәселесі бойынша, тек бір ғана Шымкент Сити жобасы аясында әлемге әйгілі құрылыс компанияларын тарту оның ішінде Елордамыздың көрікті де зәулім сарайлары мен тұрғын үйлерін тұрғызған кореялық «Highvill Kazakhstan»-ның Бас директоры Канг Джон Дэ мен Шымкент қаласы әкімдігі арасында меморандумға қол қойылып, «Shymkent City» аумағында 52 гектарға, 5500 пәтер мен 6700 орындық көлік тұрағына жалпы 160 миллиард инвестиция тарту жұмыстары жүргізілді.Сонымен қатар, қала әкімі аппаратына қатысты жер, сәулет және қала құрылысы, құрылыс саласына қатысты қызмет көрсету жұмыстарын цифравизациялау мәселесі қолға алынып, қазіргі таңда жүзеге асуда.

Әл-Фараби ауданы – қаламыздың ең орталық ауданы. Ірі кәсіпкерлік нысандар мен демалыс аймақтары көп шоғырланғандықтан, ауданның тазалығы мен тәртібіне инфрақұрылымы жалпы әлеуметтік-экономикалық дамуы басты назарда.

Әл-Фараби ауданына да Сайрам елді мекенінен «Забадам» шағынауданы, 276, 195 орамдар, Төле би ауданынан «Текесу» тұрғын алабы қосылған. Жалпы атқарылған жұмыстар аз емес, бірақ алда атқаратын жұмыстар одан да көп.

– Ал жыл басынан бері аудан әкімшілігіне тұрғындардан қанша арыз-шағым түскен? Олардың дені қандай мәселелер? Қаншасы қанағаттандырылып, мәселесі шешімін тапты?

– Қала әкімінің 2018 жылғы 16 шілдедегі өкіміне сәйкес аудан әкімінің жеке қабылдауы күнделікті сағат 09-10 аралығында жүргізіліп келеді.

2019 жылы аудан әкімі мен аудан әкімінің орынбасарларының жеке қабылдауында 381 өтініштер келіп түссе, олардың 135-і өз шешімін тауып, 174-не түсіндірме жұмысы жүргізілді, 72 өтініш құзырлы мекемеге жолданды. Әлеуметтік желілерге – facebook және instagram парақшаларына 1643 өтініш түсіп, оның 1347 орындалды, 185 өтініш иесіне түсіндіру жұмыстары жүргізіліп, 111 өтініш бойынша құзырлы мекеме тарапынан жедел түрде жұмыстар атқарылды.

2018 жылы атқарған жұмыстары жөнінде халыққа есеп беру кездесулері ауданның 3 аумағында өткізілді. Кездесу барысында, аудан тұрғындарынан барлығы 94 өтініштер мен ұсыныстар түсті. Оның ішінде 7-не кездесу барысында жауап беріліп, қалған 87 өтініші бойынша іс-шара түзіліп, бұқаралық ақпарат құралдары арқылы жарияланды. Түзілген іс-шараны орындау мақсатында құзырлы мекемелермен бірлесіп жұмыстар атқарылуда. Жалпы атқарылған жұмыстар жөніндегі мәліметтер аудан әкімінің ресми сайтында және «Шымкент келбеті» газетінде жарияланып тұрады.

– Міне, 2019 жылдың 2-тоқсаны қорытындыланды. Аудан әкімінің жұмысын бағамдайтын бірнеше көрсеткіш (инвестиция көлемі, ашылған жұмыс орындар саны, ана мен бала денсаулығы, білім сапасы, бюджет игерілуі секілді) барын білеміз. Тоқсан қорытындысымен осыларға тоқталсаңыз, өсім мен кему болса, себебін айтсаңыз...

– Ауданның бекітілген ережесіне сәйкес нақты міндеттер белгіленген. Аудандағы инвестиция, жұмыс орындары, ана мен бала денсаулығы, білім сапасы қала әкімі аппаратының тиісті басқармаларына жүктелген.

Біздің басты міндеттеріміз – аудан аумағын санитарлық тазалық пен инфрақұрылым жүйелерін дамыту, абаттандыру, құзырлы мекемелермен бірлесе отырып қоғамдық тәртіпті сақтау, оның ішінде: ретсіз сауда мен заңсыз жарнамалардың алдын алу және күресу, салық және бюджетке төленетін басқа да міндетті төлемдерді жинауға жәрдемдесу, шаруа немесе фермер қожалықтарын ұйымдастыруға, кәсіпкерлік қызметті дамытуға жәрдемдеседі. Тарихи және мәдени мұраны сақтау жөніндегі жұмысты ұйымдастырады, табысы аз адамдарды анықтайды, жоғары тұрған органдарға еңбекпен қамтуды қамтамасыз ету, атаулы әлеуметтік көмек көрсету жөнінде ұсыныс енгізеді, жалғызілікті қарттарға және еңбекке жарамсыз азаматтарға үйінде қызмет көрсетуді ұйымдастырады, жергiлiктi әлеуметтiк инфрақұрылымның дамуына жәрдемдеседi өз құзыретi шегiнде елдi мекендердi сумен жабдықтауды ұйымдастырады және су пайдалану мәселелерiн реттейдi. Сондай-ақ, елді мекендерді абаттандыру, жарықтандыру, көгалдандыру және санитарлық тазарту жөніндегі жұмыстарды ұйымдастырады. Аудан бойынша жалпы 4900 көп балалы ана болса, олардың 351 «Алтын алқа» және 935 «Күміс алқа» иегерлері. Елбасының Жарлығымен жыл басынан бері 14 «Алтын алқа» және 55 «Күміс алқа» төсбелгілері табысталды.

– Әл-Фараби ауданы қаланың ең тығыз орналасқан, мәселесі көп аудан. Ретсіз сауданы ауыздықтау қиындық туғызып отырған жоқ па? Мұны қалай шешіп отырсыздар?

– Аудан бойынша жыл басынан ретсіз саудамен айналысқан 1400 тұлғаға құзырлы мекемелермен бірлесе отырып, Әкімшілік құқық бұзушылық туралы Кодексіне (204, 505 баптарына) сәйкес хаттама толтырылып, 439 000 теңге көлемінде айыппұл салынған.

Өткен жылы аудан аумағында заңсыз орналасқан 128 дүңгіршектер алынып, оның ішінде Төле би көшесінің бойында (Қырғы базар аумағында) 34 заңсыз орналастырылған дүңгіршектер сот шешіміне сәйкес орнынан сүрілген болса, «Визит» сауда үйінің алдында орналасқан 18 заңсыз дүңгіршектер алынды.

Шымкент қаласының құрылыс бақылау басқармасына және жер қатынастары басқармасына нысаналы мақсатына сай пайдаланбай жатқан жерлер бойынша 27 хат жолданып, 10 нысан бойынша Әкімшілік құқық бұзушылық туралы Кодексіне сәйкес, 2 320 000 теңге көлемінде айыппұл салынды.

Аудан әкімі аппаратының іс-шара жоспарына сәйкес, аудандағы негізгі көшелерде және коммерциялық нысандарда орналасқан жарнамаларды ретке келтіру мақсатында 700-ге жуық ірі жарнама және 11 мыңға жуық хабарлама ретінде жапсырылған ұсақ жарнамалар алынды. Жеке кәсіпкерлерге жарнамаларын заңдастыру қажет екендігі туралы түсіндіру жұмыстарының жүргізілуі нәтижесінде 200 заңды тұлға тіркеліп, жалпы 2018 жылы сыртқы (көрнекі) жарнама бойынша аудандық бюджетке түскен түсім көлемі 86 млн. теңгені құрады.

– Әкімдік алдындағы турникетке көзқарасыңыз туралы естісек.

– Елбасының 2018 жылғы 5 қазандағы «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауын іске асыру жөніндегі жалпыұлттық іс-шаралар жоспарының 88-тармағына және Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы А.Шпекбаевтың тапсырмасына сәйкес, Шымкент қаласы әкімінің аппараты және Шымкент қаласының бюджетінен қаржыландырылатын барлық атқарушы органдардың ғимараттарында қолжетімділікті есептеу және бақылау жүйесі (ҚЕБЖ) орнатылған. Бұл іс-шара тек мемлекеттік қызметшілердің Еңбек заңнамасын қатаң ұстану, демалыс күндері жұмысқа шығу және үстеме жұмысқа тартылу практикасын тоқтатуға бағытталған.

Ғабит Патшаханұлы, енді әңгімемізді еңбек жолыңызға қарай бұрсақ. Ең алғаш Каспий экология прокуратурасында бастапсыз. Табиғатты қорғау, оның ішінде Атырау облысындағы прокуратура саласына қалай келдіңіз?

– Мен Қ.А.Яссауи атындағы Халықаралық қазақ-түрік университетінің қаржы, Халықаралық құқық және нарық Академиясында заңгер мамандығы бойынша жоғары білім алып, оқу орнының жолдамасымен алғаш еңбек жолын 2000 жылы Каспий экологиялық прокуратурасының маманы, Каспий экологиялық прокуратурасы прокурорының көмекшісі, 2001 жылы Атырау табиғатты қорғау прокурорының көмекшісі болып қызмет атқардым.

Прокуратура саласынан Сот саласына ауысыпсыз. Еңбек жолыңыздың осы жылдарына кішігірім тоқталсаңыз.

– Елордамыз қазіргі Нұр-Сұлтан қаласына ауысқаннан кейін жастардың барлығы көптеп тартыла бастады. Мен де осы көштен калмай «Арман қала –Астана» деп арманымды жүзеге асыруға қадам бастым және бұл қадамыма еш өкінбеймін.

2002 жылы Нұр-Сұлтан қаласындағы «Астана Интернационал» ЖШС заңгері, 2002–2016 жылдары аралығында Қазақстан Республикасы Жоғарғы Сот аппаратында референті, бас сарапшы, бас консультант, сектор меңгерушісі, бөлім меңгерушісі, хатшылық меңгерушісі қызметтерін атқардым.

– Сот саласынан мемлекеттік қызмет, оның ішінде жергілікті өзін-өзі басқару саласына ауысып келу қиын болмады ма? Осы екі саланың қайсысында өзіңізді жақсы сезінесіз? Егер қайта таңдау мүмкіндігі берілсе, қайсы саладан бастар едіңіз?

– Ең біріншіден ауысу мәселесіне келер болсақ, Қазақстан Республикасының Президенті жанындағы кадр саясаты жөніндегі ұлттық комиссияның шешімімен менің қызмет орнымдағы лауазымым «А» корпусына енгізілді. Сонымен, Қазақстан Республикасы президенті Әкімшілігінің және Шымкент қалалық мәслихатының келісімдерімен Шымкент қаласының Қаратау ауданы әкімі лауазымына тағайындалдым.

Екіншіден, барлығымыз мемлекеттік заңға бағынамыз. Таңдау мүмкіндігі келіп жатса маған халықпен қызмет жасау, өзіме жақындау. Әлихан Бөкейхановтың «Ұлтына, халқына қызмет ету – білімнен емес, мінезден» – деген сөзі бар. Сондықтан мен халықпен жұмыс жасауды таңдар едім. Себебі, бұрынғы жұмысымда тек қана құжаттармен жұмыс жасаған болсам, мұнда халықпен етене жұмыс істеп мұң-мұқтажын тыңдап, оның шешу жолын саралап, мейлінше күш-жігерімді азаматтардың әл-ауқатын арттыруға жұмсадым. Ауыз су болсын, электр жарығымен, газбен қамтамасыз ету, жол салу сияқты халыққа қолайлы жағдай жасағанның арқасында елдің оң ықыласы мен батасына бөленіп тұрамыз. Әрине, ол менің ғана жұмысым емес, біздің ұжымдық жұмысымыздың жемісі деп білемін.

– Енді ұжымыңызға ойыссақ. Қанша қызметшіңіз бар? Басшы ретінде қызметшілеріңізге, шәкірттеріңізге, тіпті, өзіңізге қоятын талаптарыңызды айта кетсеңіз.

– Аудан әкімі аппаратында жалпы 29 мемлекеттік қызметші жұмыс атқарады. Мемлекеттік қызметшіге артық талап қою мүмкін емес. Себебі, мемлекеттік қызметтің жұмысын реттейтін арнайы заң бар және әр маманның өзіне жүктелген нақты лауазымдық міндеттері бар. Мемлекеттік қызметші халықпен тығыз жұмыс жасайтындықтан өз міндетіне жоғары жауапкершілікпен қарап өзін-өзі үнемі жетілдіріп отыруы қажет.

– Үздік мемлекеттік қызметші дегенде қызметшілеріңіз арасынан, әлде, әріптестеріңізден кімді атар едіңіз? Оның қай қасиетін үлгі тұтасыз? Мемлекеттік қызметшіні нендей қасиеттер даралап тұруы керек?

– Үздік мемлекеттік қызметші – деп бір адамды даралауға болмайды. Себебі, біздің жұмысымыз – ұжымдық жұмыс! Сондықтан, қазақтың «Жаяудың шаңы шықпас, жалғыздың үні шықпас» деген жақсы бір сөзі бар. Нәтижелі жұмыс жеке бір адамның емес жалпы ұжымның арқасында жететін жетістік. Қасиеттерге келсек мемлекеттік қызметшіге жауапкершілік пен орындаушылық, ұйымдастырушылық осы үш қасиетті атап айтуға болады.

– Жас мемлекеттік қызметші жаңадан жұмысына кіріскен сәтте қызметтік жүктемелерден бөлек өзге қандай тапсырмалар бересіз? Нені үйренуі керек? Сіздің мемлекеттік қызметші мектебіңіздің ерекшелігін айтсаңыз...

– Мемлекеттік қызметке алғаш рет кірген азаматқа олардың атқаратын лауазымына сәйкестігін тексеру мақсатында заңға сәйкес сынақ мерзімі белгіленеді. Сынақ мерзімімен қоса мемлекеттік қызметте бірнеше жыл тәжірибесі бар тәлімгер бекітіледі. Қызметтік жүктемелерден бөлек, заңға сәйкес өзге тапсырмалар жас мемлекеттік қызметшінің басқа да бастамашылық қасиеттерін айқындау мақсатында берілуі мүмкін. Мәселен, мамандығы экономист болғанымен, қасиеттерді айқындау мақсатындағы тапсырмалардың нәтижесінде позитивті әрі шығармашылық, ұйымдастырушылық қабілетін байқауға болады.

Жас мемлекеттік қызметші лауазымдық міндеттерін ұтымды әрі тиянақты орындап үйлестіру жұмыстарына жауапкершілікпен қарап, өз міндеттерін ұқыпты, мұқият атқаруды үйренуі керек.

Мен мемлекеттік қызмет саласын жетілдіру мен дамытуға, тиімділігін арттыруға уақытылы шешім қабылдауға қызметшілерді үнемі бағыттап отырамын. Сонымен қатар, қызметшілерге тапсырылған жұмысты орындауда ерекше зейін салып, еңбек тәртібін, қызметтік әдеп нормаларын, мемлекеттік органның ішкі тәртібін сақталуына аса назар аударамын.

– Әдеп кодексі талаптарына жауап бере алмаған, сол себепті жұмыстан босатылған қызметшіңіз болды ма? Мүдделер қақтығысын қалай шешесіз?

– Әдеп кодексі талаптарына жауап бере алмаған, сол себепті жұмыстан босатылған қызметші болмаған. Ал мүдделер қақтығысының болмау себебі, әріптес қызметшілердің арасында халықтың мемлекеттік органдарға сенімін нығайтуға, мемлекеттік қызметте өзара қарым-қатынастың жоғары мәдениетін қалыптастыруға және мемлекеттік қызметшілердің әдепсіз мінез-құлық жағдайларының алдын алуға бағытталған жиналыстар мен құқықтық сабақтарды жиі өткізіп тұруымыздың нәтижесі деп білем.

– Басқалармен салыстыра отырып, мемлекеттік қызметші келбетін санамалап берсеңіз.

– Мемлекеттік қызметші ең бірінші жұмысына кіріскен сәтінде халық пен мемлекеттік органдардың өкілдерінің алдында ант береді. Мұндағы аса назар аударатын мемлекеттік қызметші жауапкершілікті сезіне отырып, елдің Конституциясы мен заңдарын сақтауға, халқына адал да білікті қызмет етуге ант етеді.

Мемлекеттік қызметші деп білімді де білікті, қарапайым әрі адал, ашықтық пен жариялылықты ұран еткен азаматты айтуға болады.

– Басшы ретінде қандай басқару менеджментін басшылыққа аласыз? Жергілікті басқаруға қай тәсілдер тиімді? Өзіңіз қайсысын қолайлы көресіз?

– Әрбір азаматты өзіңмен тең көру, басшылық құрам, орындаушы құрам – деп бөлмей олардың ой-пікірін тыңдап, жұмысқа ынталандыру, өзімнің немесе өзге де азаматтардың еңбек жолын мысалға келтіре отырып әрдайым бағыт-бағдар беріп мемлекеттік қызметке деген ынтасын арттырып, осы қызметтен бұдан әрі үлкен лауазымдарға да жетуге болатындығына сенімін арттыру және ең бастысы сендіру.

Жергілікті басқаруға нақ мына тәсілдер тиімді – деуге болмайтын шығар. «Осы менің еңбегімді бағаламайды-ау» дейтін кейбір азаматтар болады. Мұндай азаматтар қатты қателеседі. Әрбір басшы қызметшілердің істеген еңбегін бағалайды және оған тиісті баға беріп отырады. Мемлекеттік қызметтік жүйенің жолға қойылған өз тәсілі, яғни, қағида бар және осы қағиданың ең бірінші талабы – адамның, қызметшінің жауапкершілігі.

Күн сайынғы күн тәртібін неден бастайсыз? Қалай аяқтайсыз? Бос уақытыңызда атқаратын шаруаларыңызды айтып берсеңіз.

– Күнделікті күн тәртібім таңертең сағат 9-10 аралығында аудан тұрғындарын жеке қабылдаудан бастап, осы қабылдауда болған арыздар мен өтініштерді әріптестеріммен талқылап, жылдам әрі оң шешімін табуға ықпал етемін.

Әрдайым қызметшілердің арасында заң нормаларын ашық талқылап, өзекті мәселелерді басты назарға алып, бақылауда ұстап, өткен күннің қорытындысы бойынша атқарылған жұмыстардың нәтижесін сұраймын. Ал бос уақытымда «Отан – отбасынан басталады» демекші, отбасыма көңіл бөліп, бала-шағаммен бірге өткізуге тырысамын.

– Әңгімеңізге рақмет!

Сұхбаттасқан – Сейдалы ДҮЙСЕБАЙҰЛЫ

 

 
«Америка төрінде еліміздің Әнұранын орындау мен үшін ең үлкен мәртебе болды» Печать
12.07.2019 17:45

Орынбасар ӘБУ, әнші: «Америка төрінде еліміздің Әнұранын орындау мен үшін ең үлкен мәртебе болды»

Қазақты әлемге танытып жүрген жандар аз емес. Соның бірі – Шымкенттен шыққан Орынбасар Әбу бауырымыз. Бұл жігіт үстіміздегі жылдың 9 маусымында отандасымыз, әлемге әйгілі кәсіби боксшы Геннадий Головкиннің Стив Ролсспен өткізген жекпе-жегінде Қазақстанның Әнұранын жанды дауыста орындап, еліміздің ғана емес, күллі әлемнің назарына ілікті. «Ұлттық киім киіп, Америкада ән шырқаған қазақ кім болды екен?» деп ғаламтор ақтардық. Кезіккен мәлімет мардымсыз болды. Әлеуметтік желінің барлығын аралап шықтық. Фейсбук желісіне тіркелген екен. Байланысқа шығып, телефон арқылы сұхбаттасудың сәті түсті.  Осы ретте Орынбасар жайлы  сіздерге де  кеңінен таныстыруды жөн көрдік.


– Орынбасар Құрбанәліұлы, әдемі дауысыңыз бен таңғалдырар дарыныңыз бар екеніне көз жеткіздік. Енді өзіңіз туралы жақынырақ білгіміз келеді...

1991 жылдың 12 қарашасында Шымкентте дүниеге келдім. 3 ағайындымыз.  Менің алдымда 1984 жылғы Жәнібек деген ағам шетінеп кеткен соң, артынан  дүниеге келген маған «орнын басты» деп Орынбасар қойған екен.  Мектепті орыс тілінде  №31 Терешкова атындағы жалпы орта мектептің 9-сыныбына дейін оқыдым. 9-сыныптан кейін 2007 жылы Шымкенттегі  «Оңтүстік Қазақстан саз колледжінің»  үрмелі және соқпалы аспаптар факультетінің кларнет сыныбында үздік бітірдім. Бірақ кларнет аспабы жаныма жақын болмағандықтан, одан ары қарай кларнетте ойнауды дамытпадым. 2011 жылы Нұр-Сұлтандағы Қазақ ұлттық өнер университетінің өнер факультетінің ішіндегі эстрада және вокал мамандығы бойынша оқуға түсіп, 2015 жылы тәмәмдадым. 20132016 жылдары өнердегі жолымды Елордада, ҚР Қорғаныс министрлігінің орталық ансамблінде солисті болып жалғастырдым. Қазір АҚШ-тамын.

– Ең алғаш қатысқан  байқауыңыз есіңізде ме және қандай байқауларда бақ сынадыңыз?

2011жылы колледж бітіргеннен кейін Нұр-Сұлтан қаласында республикалық француз әндерінің аясындағы «Франкафония» байқауы өтті. Сол байқауда «Гран Приді», 2013 жылы Лос-Анджелестің Калифорния штатында өткен «Coolibri» байқауында да бас жүлдені жеңіп алдым.  2014 жылы «Дельфийские игры» деген халықаралық байқаудың дипломаты атандым. 2016 жылы «Қазақстан дауысы» байқауына қатысып, Жанна Орынбасарованың тобында болып, ІІІ орынды иелендім. 2018 жылы Нъю-Йорк қаласында өткен «West park music festival» байқауында да Гран При иегері атандым. Бұл байқауға 30-дан астам мемлекеттен әншілер қатысқан еді.

– Керемет! Сондай-ақ, жеке топ құрып, жұмыс жасағаныңызды да естідім. Осы жөнінде айта кетсеңіз...

2016 жылы «Live Band» атты жанды дауыста орындайтын оркестрде жұмыс жасадым. «Action live band», «Déjà vu live band» деген өзім құрған  топтардың солисті болдым.

– Жалпы, қазақстандық байқаулардың әділ өтетініне сенесіз бе?.. Мәселен, өзіңіз қатысқан «Қазақстан дауысы» қаншалықты әділ өтті деп ойлайсыз?

Негізі қандай нәрсе болса да, қалай ойласаң, солай жүзеге асады. Мен қатысқан «Қазақстан дауысы» жобасы әділ өтті деп айта аламын. Біреу үшін емес, өзім үшін қатыстым. Халық кімді қалады, сол адам финалға шықты, жеңімпаз атанды. Аталған жобадағы жеңімпаз Дінмұхаммед Дәулет – қарапайым қазақтың баласы. Нағыз әділ таңдау болды.

– Ол жобадан кейін не істедіңіз? Немен айналыстыңыз?

– Жобадан соң, «той бизнес» саласында жүрдім. Сол кезде халық арасында аздап танымалдылығым артты. Бірақ туған елімде ұзақ тұрақтамай, барлық жиған абырой, атағыма да қарамай, 2017 жылы тәжірибе жинау үшін «Америка қайдасың?» деп, Нью-Йоркке тартып отырдым.

– Қазақстанның ішіндегі басқа қала емес, тілі, діні бөлек бөтен елге барлығын тастап,  тәуекел етіп кете салу екінің бірінің қолынан келе бермейді. Оның үстіне тәп-тәуір атағыңыз шығып жатқанда. Сонымен, қиналмадыңыз ба?..

– Туған қаламды тастап, бөтен жерге бару оңайға соқпады. Әрине, қиналдым. Өкінген кездерім де болды. Құрылыста да жүрдім. Аспаздың көмекшісі де болдым. Жұмыс талғап, қол қуысырып отырмай, барынша алға ұмтылып, қандай жағдайдан болса да шыдамдылықпен осындай дәрежеге жеттім. Бірақ біреу үшін емес, өзімді осы сынақтарда сынау үшін тәуекел еттім. Сынақтарды сынақ емес, сабақ деп қабылдадым. Жаратушы көтере алмайтын сынақты ешкімнің басына бермейді деп ойлаймын.

Сөз саптауыңызға қарасам, шешендік байқалады. Кітап оқисыз ба?..

– Мектепті орыс тілінде оқығанмын. Айналамдағы араласатын ортам орыс тілділер болды. Қазақша сөйлеуім шорқақтап бара жатқан соң, М.Әуезовтың «Абай жолын» оқыдым. «Абайдың қара сөздерін» жатқа білемін және күнделікті өмірде қолданыста пайдаланамын. Бірнеше қазақша кітаптарды жақсы түсінбесем де, оқып шығатын кездерім болады. Себебі, өзімді дамытуда бұл да көмектеседі. Шалқар Әбішұлының: «Өз тіліңді өшірме, өшіргенді кешірме» деген сөзін ұран етіп ұстанамын. Айнаның алдында отырып, өз-өзіммен қазақша сөйлесіп, жұмыс жасаймын.

– Психологияны да меңгерген сияқтысыз немесе өмірдің өзі сізді психолог етіп жасап алған тәрізді. Жалпы, шешім қабылдар кезде не нәрсеге көңіл бөлесіз? Ал қателескен кезіңізде өзіңізді қалай жұбатасыз?

– Адамның қолынан барлығы келеді және мүмкін еместің өзінен мықты мүмкіндік жасау да өзіміздің қолымызда дер едім. Тек жүректі тыңдай білу керек. Мен жүрегімді тыңдау арқылы шешім шығарамын. Өйткені, жүрек тек шындықты айтады. Сонымен қатар, алға қойған арманың мен мақсатың нық болуы керек. Бұл өмірде қателеспейтін пенде болмайды. Тек сол қателіктерден дер кезінде сабақ алып, түзетіп отыру қажет. Адам «жақсылық көрсе де, жамандық көрсе де өзімнен» деген ұстанымды ұстанса, бір-бірін айыптамас еді.

– Әлеуметтік желіге қаншалықты уақыт бөлесіз? Оның пайдасы мен зиянын атап айта аласыз ба?

– Әлеуметтік желіде көп отырмауға тырысамын. Пайдасы да, зияны да теңдей. Тек дұрыс жағын пайдалану өзімізге байланысты. Адам өзіне керектіні ғана алу арқылы жан дүниесі тынышталып, жүйкесі орнында қалады.

– Неден шаршайсыз?

– Шынайылықтың жоқтығы шаршатады.

– Адам болып қалыптасуымыз үшін не істеуіміз керек?

– Адам «алтын орта» қалыптасыра алмаса, бір-бірін тыңдаудан, тәрбилеуден қалады. Өзіне керектіні алып отыру адамды жақсы жағынан қалыптастырады.

– Кездейсоқтық дегенге сенесіз бе?

– Орыс халқында: «Кездейсоқтық болмайды» деген жақсы сөз бар. «Адамның басы – Алланың добы». Ойламаған жерден күтпеген өзгерістер орын алуы мүмкін. «Құдайсыз қурай да сынбайды». Мен осы сөзбен келісемін. Өмірдегі барлық жайт Алланың қалауымен болады. Менің Америкада жүруім де кездейсоқтық емес. Бұл – биік белестерді бағындыруымның бастапқы сатысы.

Ореке, сіз айтқан сөзбен келіскім келіп отыр. Себебі, жақында өткен Генаның жекпе-жегінде Қазақстан республикасының Әнұранын орындауыңызды «әу бастан Алла Тағала есепке алып тұр» деп қарадым. Айтыңызшы, Әнұранды орындау мәртебесіне қалай қол жеткіздіңіз?

Еліміздің Гимнін орындау үлкен бақыт болды. Жекпе-жекке аз ғана күн қалғанда, өкілеттіктен хабарласып, «Әнұран орындайсың ба?» деп ұсыныс білдірді. Басында қорқақтап, жоқ деп ұсынысты кері қайтардым да, ойлана келе, намысқа тырысып, орындаймын деп шешім қабылдадым. Мәтінінің өзгеруіне байланысты сөзін толық білмегендіктен, бір күн бас алмай отырып жаттадым. Бірінші орында сөзінен жаңылыспай, ұмытпай айтып шығуым және қазақ елінің абыройы тұрды.

– Өмір жолыңда кімдерді ұстаз тұтасыз?

Ұстаздарым көп болды. Ерекше атап айтатын ұстазым, әкемнің туған бауыры  Әміреқұл Әбу. Ол кісі жаныма жылу сыйлай білген, маған сеніммен қараған, өрге сүйреп, «Бір Алла жар болсын!» деп ақ батасын беріп, рухани демеу білдірген, жанымды жылытып, биіктерге қарай ұмтылуыма шабыт сыйлаған бірден бір адам. Өзі өнер саласына жақын болған соң сырласым, ақылшым. Мінезі ерекше. Ақкөңіл, таза, адал да мейірімді жан. Біреу жайында жаман әңгіме айтқызбайды. Өзі де өзге туралы артық әңгіме айтпайды. Ілімді, білімді жан. Ағаммен мақтанамын. Үлгі тұтамын!

– «Жұлдыз ауруына» шалдығып қалған кездер болды ма? Еліміздің эстрада жұлдыздарынан кімді тыңдайсыз?

Қалай бармын, солай қаламын. Адамгершілік пен қарапайымдылықты бірінші орынға қоямын. Қарапайым қазақтың намысты қара баласымын. Елімізбен әрдайым біргемін. Мені тыңдайтын да, өсіретін де, өшіретін де халық. Халық  құдайдың бір аты! Қазақстан эстрада жұлдыздарынан М.Беспаев ағамызды тыңдаймын. Жүректен жүрекке жеткізіп  айтады. М.Арынбаев пен Ж.Жексенұлы ағаларымыз дауыстары қазақтың даласындай кең, иірімдері өзгеше әншілер.

– Қандай бағыттағы әндерді ұнатасыз?

Джаз, соул, фанк, фьюжн бағытындағы әндер ұнайды.

– Алдағы уақытта қазақстандық сазгерлермен жұмыс жасау ойыңызда бар ма? Қандай ән жаздырар едіңіз?

Ойымда бар. 2018 жылы 29 желтоқсанда әншілік өнеріме жылдық қорытынды жасап, Америка төрінде жеке шығармашылық кеш өткіздім. Концертті «Меmories», яғни, «Естеліктер» деп атап, Батырхан Шүкенов пен Мұрат Насыровтың және «А-студио» тобының әндерін орындадым. Әрине, басым бөлігінде өз репертуарымдағы әндер айтылды. Болашақта «Туған жер», «Отан» туралы ән жаздырып айтып, еліме деген сағынышымды ән арқылы жеткізсем деген жоспарым бар.

– Әннің сөзіне мән бересіз бе, әлде, әуен маңызды ма?

Мен үшін бірінші орында әннің сөзі  маңызды. Сөзі мағыналы болмаса, өзгерткіземін. Яғни, әнді мәтінге қарап орындаймын.

– Елге қайтатын ойыңыз бар ма?

Әрине, бар. Бірақ бастап, жоспарлап қойған ісімді аяқтамай, қайта алмаймын. Нәсіп етіп, қолға алған істерім орындалса, Отанға барып қызмет етемін. Көбісі «шет елде барлығы жақсы, айлығы жоғары, дамыған мемлекет» деп алыстан тамсанып отырады. Олар салықтың да жоғары екенін біле ме? Бұл жақта не болып жатқанын мен сияқты шетте тұрып жатқандар ғана біледі. Қай жерде жүрсек те ояу, етіміз тірі, жалқаулық жасамасақ, табыс көзін ашып, дұрыс өмір сүруге болады. Қалай болғанда да өз елімізде әлдеқайда жақсы. Қадірін білейік!..

– Орынбасар, келелі сұқбат үшін мың алғыс! Уақыттың айырмашылығына қарамай, түн жарымында 2 сағат уақыт бөліп, жұмысыңызды кейінге ысырып, сұхбат бергеніңізге рақмет айтқым келеді.  Сіздей текті ұлды тәрбиелеген ата-анаңызға Алла ұзақ ғұмыр берсін. Қазағымның мақтан тұтар өзіңіздей патриот азаматтары көп болсын!

– Сізге де рақмет! Қазақстаным әрқашан жүрегімде!

Сұхбаттасқан – Гүлзат МҰХТАРҚЫЗЫ

 
«Қолжетімділікті арттыру мақсатында «Ашық бюджет» интерактивті картасын енгізу жоспарлануда» Печать
12.07.2019 16:08

Кенжебек ЖАНБОСЫНОВ, Шымкент қаласы Қаржы басқармасының басшысы:

«Қолжетімділікті арттыру мақсатында «Ашық бюджет» интерактивті картасын енгізу жоспарлануда»

Елбасының «100 НАҚТЫ ҚАДАМ» – Ұлт жоспары тапсырмасында «Кәсіби мемлекеттік аппарат құру» тармағы ерекше орын алады. Бұл тапсырмаға сәйкес, бүгінгі таңда жергілікті өзін-өзі басқару саласында атқарылып жатқан жұмыстар жетерлік. Әсіресе, жергілікті әкімдіктер мен мемлекеттік органдардың ішкі «қан айналым жүйесі» қызметін атқаратын қаржы басқармасының атқаратын қызметі ерек. Осы жұмыстарды оқырманға жеткізу мақсатында Шымкент қаласы Қаржы басқармасының басшысы Кенжебек Жанбосыновтан сөз сұрағанды жөн санап едік. Сауалдарымызға басқарма басшысы қаржы саласының маманы, сөздің емес, цифрдің адамы болғандықтан, атқарып жатқан ісі туралы қысқа әрі нұсқа жауап берді.


– Кенжебек Керімбекұлы, бірнеше жылдан бері қаржы саласында жұмыс істейді екенсіз. Бұл саланы таңдауыңызға не себеп?

– Әр адамның өзінің қолдан келер дүниесі, сүйікті ісі, жанына жақын мамандығы болады. Мен өз мамандығымды жақсы көріп, мақтан тұтамын. Қаржыгер болудағы мақсатым – түрлі саладағы мекемелермен тығыз байланыс орнатып, қаржы жүйесін дамыту, елдің экономикасының дамуына өз үлесімді қосу.

– Қаржыгердің жұмыс тәртібі қалай болуы керек? Таңертең жұмысты неден бастайсыз?

– Мен қаржы саласын үйлестіруші және мемлекеттік қызметші ретінде өз жұмысымды күн тәртібін қалыптастырудан бастаймын. Онда ең бірінші өзекті мәселелер бойынша іс-шараларды ұйымдастыру, регламентпен бекітілген жиналыстарға қатысу, сонымен қатар, қаржы саласындағы күнделікті ағымдағы жұмыстар атқарылады.

– Еңбек жолыңызды есепші ретінде бастапсыз. Бухгалтерияның басты қағидаларының бірі – уақытылық пен нақтылық болса, мемлекеттік қызметте мұндай талаптар басты орында шығар. Бұл салада басқа нендей талаптарды талап етеді? Өзіңіз көргіңіз келетін қасиеттерге тоқталсаңыз...

– Әрине, басты талап уақытылық және нақтылық болса, онымен бірге сапалық та маңызды. Ал қаржы саласындағы қызметшілерге дер кезінде егжей-тегжейлі талдауды жүргізіп, дәлдік шешім қабылдауды талап етеді.

– Азаматтарды жеке қабылдау режиміңіз қандай? Бүгінгі күнге дейін қанша арыз-шағым түскен, олардың қаншасы қанағаттандырылды? Мәні бойынша негізінен қандай тақырыптар басым?

– Әр аптаның сәрсенбі күні сағат 17:00-ден 18:00-ге дейін жеке тұлғаларды қабылдаймын. Бүгінгі күнге дейін 4 адам коммуналдық меншікті басқару мәселелерімен қабылдауымда болды. Осы азаматтарға заң жүзінде түсіндірме берілді.

– Осы елдің азаматы ретінде сіз де мемлекеттік қызметті пайдаланасыз. Қандай жақсы өзгерістер бар, аталған қызметтің қай тұстарын жетілдіру керек?

– Қаржы саласында қызмет істеген жылдар бойы көптеген оң өзгерістер болды. Оның ішінде ең маңыздысы – мемлекеттік қызметтерді автоматтандыру. Мәселен, бұрынғы уақытта жұмыстар жазбаша атқарылса, қазіргі уақытта оның барлығы электрондық жүйеге көшірілген. Яғни, қаржылық-экономикалық есептеліктер электрондық жүйені (мамандырылған бағдарламалық өнімдерді) қолдана отырып, қалыптастырылады. Қазіргі уақытта мемлекет цифрландыруға көшуде. Оның аясында халықты қаржы жүйесіне тарту үшін және қолжетімділігін арттыру мақсатында «Ашық бюджет» интерактивті картасын енгізу жоспарлануда.

– Елбасының «100 нақты қадам» бағдарламасы жұмысыңызда қалай көрініс тауып жатыр?

– Ағымдағы жылы Шымкент қаласының жергілікті атқарушы органдары «100 нақты қадам» бағдарламасы аясында мемлекеттік қызметшілердің жалақысын факторлық-баллдық шкала жүйесі бойынша төлеуге өтті.

Алдағы уақытта барлық азаматтар үшін кірісті және шығысты жалпы жариялауды кезең-кезеңмен енгізуге байланысты қаржылық-экономикалық секторда өзгерістер күтілуде.

– Мемлекеттік қызмет пен коммерциялық қызметтер сыйыспайтыны белгілі. Дегенмен, шығармашылық пен ғылыми ізденістерге рұқсат етіледі. Нендей шығармашылық немесе ғылыми ізденістеріңіз бар? Бос уақытта немен айналысасыз дегенім ғой...

– Бүгінгі таңда ғылым саласында ізденістерім болмағанымен, жергілікті және халықаралық конференциялар, брифингтер және форумдарға қатысамын. Сонымен қатар, республикалық деңгейде және шетел мемлекеттерінде тәжірибе алмасуға қатысып тұрамын. Бос уақытта спортпен айналысамын, яғни, өзіміздің әуесқой «Барыс» футбол командамызбен бірнеше рет жарыстарға қатысып, жүлделерге ие болдық.

– Қаланың мемлекеттік мекеме саласы бойынша барлық қаржылық мәселелері көз алдыңызда. Биылғы бюджет саласында қаралған басты тақырыптарға тоқталсаңыз.

– Өздеріңізге белгілі, Шымкент қаласы республикалық маңызды қалалардың санатына жатқызылуына байланысты қаланы дамыту мен құрылысына 2023 жылға дейінгі кешенді жоспары әзірленді. Осы жоспардың аясында бірнеше күрделі жобалар іске асырылуда. Атап айтсақ, «Оңтүстік» және «Оңтүстік-Шығыс» айналма жолдары, «Темір жол вокзалы», «Әуежай», «Шымкент сити», «Қошқар ата», «Цитадель» және басқа да жобалар. Тиісінше, қаланың бюджеті осы жобаларды қаржыландыруға бағытталды.

– Қазір 2019 жылдың жарты жылдық нәтижесі қорытындыланатын уақыт. Бюджеттің игерілуі мен оның мақсатты пайдалануына қатысты деректермен бөліссеңіз.

– 2019 жылғы 6 айдың қорытындысымен кірістер жоспары 99%-ға орындалды немесе нақты 102,2 млрд. теңгеге түсті. Бұл қаражаттар 98,6 пайызға игерілді немесе 101,1 млрд. теңгеге игерілді. Әлеуметтік көмекке, бюджеттен қаржыландырылатын мекемелердің еңбек ақы қорына, қаланы ағымдағы күтіп-ұстауға, оның ішінде: санитарлық тазалық, абаттандыру, көріктендіру, ағымдағы және күрделі жолды, әлеуметтік нысандарды жөндеу жұмыстарына, инженерлік-инфрақұрылымдарды дамытуға және басқа да өзекті мәселелерге қаражат жұмсалды.

– Қаржы жылының жартыжылдығы қорытындысымен үнемделетін немесе жетіспей қалатын қаржы көлемі белгілі болған шығар. Нақтыланып, қайта бекітілетін бюджет қаражатының жинағы, оның ерекшелігіне тоқталсаңыз.

– Бүгінгі таңда, кірістердің орындалуы қатаң бақылауда. Барлық уәкілетті органдармен бюджеттің тепе-теңдігін қамтамасыз ету мақсатында қосымша көздерден кірістің түсуі іздестірілуде.

– Көрші Арыс қаласында төтенше жағдай орын алды. Бюджет нақтыланған сәтте осындай жағдайлар ескерілетінін білеміз. Эвакуациялық әрекеттерге қанша қаржы бөлінбек? Бөлінген қаржының игерілуі де сіздің назарыңызда тұрған болар?

– Қала бюджетінің есебінен Арыс қаласындағы төтенше жағдайға қаржы қарастырылмаған. Алайда, Қазақстан Республикасының азаматтары ретінде мен басқаратын мекеменің қызметшілері бір күндік жалақыларын аударды. Сонымен қатар, мекеменің қызметшілері қажетті шаруашылық, гигиеналық заттарды және азық-түліктерді эвакуациялық бекеттерге тапсырып отырды. Арыстағы апаттан зардап шеккен азаматтарға көрсетілетін көмектерден біздің ұжым да шет қалған жоқ.

– Жаңа жылдан бастап қаладағы мемлекеттік қызметшілер жалақысын есептеу өзгергенін білеміз. Бұл қала бюджетіне қаншалықты өзгеріс әкелді? Жалақы есептеу ережелері мен әдістеріне енген өзгерістерді айта кетсеңіз...

– Қаланың мемлекеттік қызметшілерінің факторлық-баллдық шкала жүйесіне өтуіне байланысты орташа есеппен жалақы 1,5 есеге өсті. Тиісінше, мемлекеттік қызметшілердің әлеуметтік жағдайы жақсарды, жұмыстан шығу көлемі азайды, лауазымдық қызметтің беделі артты. Бұл алдағы уақытта өз жемісін беріп, мемлекеттік қызметтің беделін арттыруда ерен орны болмақ.

– Мемлекеттік қызметтің артықшылықтары мен міндеттеріне өз қызметіңіз шеңберінде тоқталсаңыз. Мәселен, қызметші өз бастамашылық қабілетін көрсете алмай, бойында тұншықтырады деген көзқарас бар. Не дейсіз?

– Өзім жоғарғы оқу орнын бітірген соң, қаржы саласында қызмет ету үшін келдім. 24 жылдан астам еңбек өтілі барысында карьералық баспалдақтың барлық сатысында қызмет атқарып келемін. Әрине, барлық өмірімді мемлекеттік қызметке арнағандықтан, ешқандай өкінішім жоқ.

– Мемлекеттік қызметші жұмысқа қабылданар кезінде заңнамаларды білу талабы барын білеміз. Ары қарай жақсы маман болып, мемлекеттік имиджді оң жағынан қалыптастыру үшін нендей қасиеттері болуы керек? «Әдеп кодексі» талаптарын орындай алмай жұмыстан шеттетілетін қызметшілеріңіз болды ма?

– Мемлекеттік қызметте жұмыс атқарғандықтан, адамдар бойындағы ұқыптылықты, жауаптылықты, шыншылдықты, пунктуалдықты бағалаймын. Ал жағымсыз қасиеттерден білімге, қойылған мақсатқа жету талпыныстың жоқтығын ұнатпаймын. Мен басқаратын мекемеде «Әдеп кодексі» талаптарын орындай алмаған қызметшілер болған жоқ. Қызметшілер арасында әдеп кодексінің талаптары бойынша үнемі түсіндірме жұмыстары жүргізіліп тұрады.

– Қызметшілеріңіздің жетістіктері, қызмет барысында көтермелеу, жұмыс ауырлығына қарай ескертулер болып тұра ма?

– Қызметшілерді көтермелеу мақсатында алғыс хаттармен, мақтау қағаздарымен марапатталады. Сонымен қатар, қызметшілердің отбасындағы орын алған жағдайға байланысты материалдық көмек көрсетіледі. Мысалы, некеге тұру, бала туу, жақын туысының қайтыс болуы, зейнеткерлікке шығу жағдайларында көрсетіледі.

– Жиырма төрт жылдық мемлекеттік қызмет еңбек өтіліңізде өзіңіз де жап-жақсы мектеп болып қалған боларсыз. Шәкірттеріңіз бар ма? Олардың жетістіктері, байланыстарыңыз, тәжірибеңізді үлгі етуі бойынша айтсаңыз...

– Мемлекеттік қызметтегі еңбек өтіліміме 24 жыл болыпты. Осы ширек ғасырға жуық уақыт аралығында біраз дүниелерді үйреніп, көптеген тәжірибе жинадым. Жинаған тәжірибеммен ұжымдағы және басқа мекемелердегі жас мамандармен бөлісіп, жұмысты жедел әрі сауатты түрде орындауға дағдыландырдым. Шәкірттерім де менен үйренген білімі мен тәжірибелерін қолданып, мемлекеттік қызметтерін адал, сапалы атқарып, ел игілігіне қызмет етуде. Жас мамандарға білгенімді, түйгенімді үйретіп, қаржы саласын дамытуға үлесімді қосып келемін.

– Алдағы уақытта мекеме тарапынан атқарылатын жұмыстар мен жеке жоспарларыңыз туралы әңгімелеп берсеңіз...

– Біздің басқарма, уәкілетті орган ретінде жергілікті бюджетті атқару және коммуналдық меншікті басқару саласындағы мемлекеттік саясатты іске асыру мақсатында жылдық жоспарды қалыптастырып, бекітеді. Осы жоспарды атқару үшін әр қызметші өзіне бекітілген функционалдық міндеттемелері бойынша жеке жоспарында іс-шараларды жүзеге асырады.

– Әңгімеңізге рақмет!

Сұхбаттасқан – Сейдалы ДҮЙСЕБАЙҰЛЫ

 
«Шымкенттің логотипін біз жасағанбыз» Печать
04.07.2019 15:50

Тұрар АХМЕТОВ, Шымкент қалалық туризм және сыртқы байланыстар басқармасының басшысы:

«Шымкенттің логотипін біз жасағанбыз»

Елбасы Н.Назарбаев «Қазақстан – 2050: Бір мақсат, бір мүдде, бір болашақ» атты Жолдауында «Қазақстан медициналық туризм бойынша жетекші еуразиялық орталыққа айналуы тиіс» деген еді. Дәл осы салада еліміздің үшінші мегаполисі атанған Шымкент қаласында нендей өзгерістер болып жатқанын және аталған басқарма мемлекеттік қандай қызметтер көрсететінін білгіміз келіп, Шымкент қалалық туризм және сыртқы байланыстар басқармасының басшысы Тұрар Ахметовты әңгімеге тартқан едік.


Тұрар Асхатұлы, қаланың туризм саласын жолға қойған басқармаға басшы болып келгеніңізге көп бола қойған жоқ. Айтыңызшы, жұмысты неден, қандай жоспардан бастадыңыз?

– Қалалық басқармаға 2018 жылдың шілде айында тағайындалдым. Алайда, бұл сала маған белгілі, жаныма өте жақын десем де болады. Себебі, алдында осы салада жұмыс атқарғанмын. Бүгінгі таңда қала туризмінің қазіргі жағдайы, өзекті мәселелері мен туризмге қатысты барлық дүниелермен танысып үлгердім.

Бұл қызметке келмей тұрып та, Шымкенттің туризміне қатысты салада қызмет еттім. Мәселен, Шымкенттің логотипін біз жасағанбыз. Басында бұл туристік логотип ретінде таңдалған. Туристік логотип жасалған сәтте сараптау кеңесі құрылып, қала тұрғындары, қонақтар, ел тұрғындары, туристер арасында: «Шымкент қаласын көбірек не нәрсемен байланыстырасыз?», «Шымкентпен нендей заттар ассоциацияланады?», «Шымкент қаласы дегенде көз алдыңызға қандай түстер келеді?» деген сияқты сұрақтармен сауалнама жүргізілді. Сауалнамалар нәтижесінде ашық түстер және гүлге қатысты бейнелер көбірек анықталып, осы логотип таңдалды. Сарапшы топта журналистер, қоғам белсенділері, дизайнерлер, өлкетанушылар сынды азаматтар еді. Идея авторлығы сол сарапшы топқа тиесілі. Қызғалдақ пішінді, қошқар мүйізді туристік логотип осылай пайда болды.

Бұдан басқа да Шымкенттің туристік бағытына қатысты салада еңбек еттік. «ApexConsult» компаниясын басқарып тұрған кезімде Шымкент қаласының туристік келбетін қалыптастыру бойынша, бірінші – қала тұрғындарының өздеріне, екінші – ел және шетелдік туристерге арналған жобалар, шаралар, инфрақұрылым жобаларын жинақтаған концепциялар жасаумен айналыстық. Сондықтан, мен Шымкентке, оның ішінде туризм саласына жаңадан келгенім жоқ деп есептеймін.

Басқармаға басшы болып келгенде бірінші кезектегі жұмыс – басқарма құжаттарын рәсімдеу, қалалық бюджеттен қаржы бөлдіру, басқарма мамандарын тағайындау секілді ұйымдастырушылық жұмыстардан басталды. Екінші кезекте, қаланың туристік бизнес өкілдерімен танысу кездесуін ұйымдастырып, ұсыныстары мен негізгі проблемалық мәселелері тыңдалды. Үшінші кезекте, басқарманың алдағы жұмыс жоспары түзіліп, қадамдық іс-шаралар жоспары және 2019 жылы халықаралық деңгейде өтетін іс-шара жоспары бекітілді. Осылайша жұмысты бастап кеттік.

– Басқарма туризм саласына қатысты қандай мемлекеттік қызметтер көрсетеді? Көрсететін мемлекеттік қызметтеріңіз қаншалықты сапалы? Тұлғалар үшін қолжетімді ме?

– Шымкент қаласының туризм басқармасы өз қызметі аясында мемлекеттік қызметтер стандарттарына сәйкес бірнеше қызмет көрсетеді. Олар:

1) «Туристік операторлық қызметті (туроператорлық қызмет) жүзеге асыруға лицензия беру» қызметі;

2) «Туристік ақпаратты, оның ішінде туристік әлеует, туризм объектілері мен туристік қызметті жүзеге асыратын тұлғалар туралы ақпаратты беру» қызметі;

3) «Туристік маршруттар мен соқпақтардың мемлекеттік тізілімінен үзінді» беру қызметі.

Аталған қызмет түрлері электронды форматқа толықтай өткен. «E.gov» арқылы әр азамат сұраныс жолдай алады немесе басқармаға жазбаша түрде жүгінуіне болады.

Бүгінгі таңда көрсетілетін мемлекеттік қызметтер стандарттарына өзгерістер енгізілуде. Атап айтсақ, «Туристік операторлық қызметті (туроператорлық қызмет) жүзеге асыруға лицензия беру» қызмет түрін ғана қалдырылып, қалған екі қызметті тек басқарманың функционалдық міндетіне жүктеуде. Аталған лицензияны тек «E.gov» немесе «E.license» электронды порталы арқылы ала алады. Қызмет көрсету мерзімдері де қысқартылып отыр. Енді 3 күнтізбелік күн ішінде алуға болады.

– Міне, биылғы 2-тоқсан да аяқталып, түрлі көрсеткіштер бойынша қорытынды шыға бастады. Осы тоқсан ішінде Шымкентке ішкі және сырттан келген қанша туристер болды? Орналастыру орындарының саны, жатын орын және олар көрсеткен қызмет көлемі туралы айтсаңыз...

– Биылғы статистикалық есептің қорытындысы шыға қойған жоқ. Ол есептілікті статистикалық басқарма жүргізетіндіктен, біздің қолымызда нақты сан жоқ.

Дегенмен, жалпы статистикалық мәліметтерге сүйенсек, 2018 жылдың 12 айында қалаға келушілер саны 178 014 адамды құрап, 2017 жылдың сәйкес кезеңімен салыстырғанда (137 980 адам) 29,0%-ды құрады. Ішкі туризм бойынша келушілер саны 155 946 адам, өткен жылмен салыстырғанда (121 076 адам) 28,8%-ға артып отыр. Ал кіру туризмі бойынша келушілер саны 22 068 адам, өткен жылдың сәйкес кезеңімен салыстырғанда (16 904 адам) 30,5%-ға артқан.

Статистикалық ақпаратқа сәйкес, 2018 жылдың 12 айы бойынша орналастыру орындарында 271 981 төсек-тәулік ұсынылып, 2017 жылмен салыстырғанда (240 327) 13,2%-ға артыпты. Орналастыру орындарымен көрсетілген қызмет көлемі 2018 жылдың 12 айында 3 260 534,6 мың теңгені құрап, 2017 жылмен (2 637 347,4 мың теңге) салыстырғанда өсу қарқыны 23,6%-ға артып отыр. Айта кетсек, Бүгінгі таңда Шымкент қаласында 106 орналастыру орындары (ірі қонақ үйлер, эконом санаттағы қонақ үйлер, аппартаменттік пәтерлер мен шағын хостелдер) орналасқан.

– Жұмыс барысында өзіңізге және қызметкерлеріңізге қандай талаптар қоясыз. Басқармаға келетін арыз-шағым көп пе? Олармен жұмыс қалай жүргізіледі? Сіздің ойыңыздағы мемлекеттік қызметшінің бейнесі қандай?

– Азаматтар тарапынан басқармаға көбінесе ұсыныстар келеді. Арыз-шағымдар да бар. Олардың барлығы заң талабына сай қаралып, толықтай зерделеніп, арыз-өтініш иесіне жауап жолданады. Мемлекеттік қызметші – заман талабына сай, білімді, жан-жақты, жаңашыл өзіне жауапкершілік ала алатын азамат болуы керек деп ойлаймын.

– Әңгімеңізге рақмет!

Сұхбаттасқан – Сейдалы ДҮЙСЕБАЙҰЛЫ

 
Бет 1 , барлығы 32
 

Соңғы пікірлер

 
Барлық құқықтар қорғалған.
"Қызмет" интернет басылымы.