2022-08-09

Жыл санап отбасын құратын жұптардың саны артып келеді.

Ендігі жерде елімізде некені тіркеуге өтініш беру мерзімі қысқаратын болады. Яғни, неке қиюды тіркеудің ай сайынғы мерзімін күнтізбелік 15 күнге дейін қысқарту мәселесі қарастырылып жатыр. Сонымен қатар, өмірде боалтын әртүрлі жағдайларды ескере отырып, мерзімді қысқарту мүмкіндігі сақталатын болады.
Қолданыстағы заңнама нормаларына сәйкес, елімізде некеге тұру туралы өтініш некені мемлекеттік тіркеуден бір ай бұрын беріледі. Көптеген жұп үшін бұл тым ұзақ және оны азайту үшін қосымша құжаттарды тіркеу керек.
Сонымен қатар, жүктілік, баланың тууы, тараптардың бірінің өміріне тікелей қауіп төнуі және басқа да ерекше жағдайлар сияқты дәлелді себептер болған жағдайда некені тіркеу мерзімін бір күнге дейін қысқартуға болады. Ол үшін тиісті құжаттарды, медициналық мекемелерден, жұмыс немесе оқу орындарынан анықтамаларды ұсыну керек.
Көптеген ерлі-зайыпты тіркеу органдарына жүгінген кезде той күнін алдын ала белгілеп, мейрамханаларға тапсырыс береді, содан кейін ғана некені тіркеуге өтініш береді. Алғаш үйленгелі отырған әрі баласы жоқ жастар үшін құжаттардан тек жеке куәлік пен мемлекеттік баж салығын төлеу талап етіледі.
Әділет министрлігінің баспасөз қызметі хабарлағандай, Қазақстанда соңғы 10 жылда тіркелген некелер санының тұрақты өсуі байқалады. 2018 жылы 138 876 неке қиылса, 2019 жылы 139 735, 2020 жылы 129 165, 2021 жылы 140 762 неке тіркелген. Пандемия ықпал еткендіктен 2020 жылы некеге тұруға ниет білдіргендер аз болған.

Қызмет ақпарат

 

Яндекс.Метрика