QyzmetAqparat
Түркістан облысы Келес ауданы әкімінің міндетін уақытша атқарушы Алмас Сексенбаев бүгін тұрғындарды жеке мәселелері бойынша қабылдау өткізді. Жеке қабылдауға аудан бойынша жеті тұрғын келіп, өздерін толғандырған мәселелерін жеткізді.
Қоғамдық қабылдауға келгендердің дені өздері тұрып жатқан аймақтардағы инфрақұрылым жүйелерінің нашарлығын, жер мен баспана кезегі туралы және әлеуметтік мұқтаждықтарын сөз етті. Мәселен, Біртілек ауылының тұрғыны Ерғали Жоланов Әлия Молдағұлова, Иса Байзақов және Тамабай Исабаев көшелеріне асфальт төсеуді сұранды. Ауылдан стадион құрылысын жүргізуге рұқсатнама құжаттарын рәсімдеу ісіндегі қиындықтар жайын сөз етті. Ал, Абай ауылының тұрғыны, кәсіпкер Зейнеп Оспанова ауданда кәсіпкерлікті дамытуға байланысты жобаларын таныстырса, Ошақты ауыл округының тұрғыны Ғани Байларов баспана кезегі жайлы мағлұматтарды сұрап білді.
Қабылдау барысында аудан әкімінің міндетін уақытша атқарушы Алмас Сексенбаев әрбір тұрғынның жеке мәселесін тыңдап, олардың заң аясында шешу жолдарын қарастырды. Бірқатар мәселені шешу үшін мәселеге жауапты бөлім басшыларына тапсырма берді. Сонымен қатар, әлеуметтік көмек сұраған аудан тұрғынына мүмкіндігінше көмек жасалатынын жеткізді.
