Жаңаталап сапалы электр қуатымен қамтылатын күн жақын

Жақын арада сапалы электр қуатымен қамтылатын елді мекендердің бірі — Жаңаталап.  Құрылысы өткен жылы басталған. Бүгінгі күнге дейін 95% құрылыс жұмысы аяқталды.  Жұмыс барысында 42,2 шақырым электр желісі тартылып, 1 810 электр бағаналары орнатылды.  Сапалы электрмен қамту жұмысы толығымен қазан айының соңына дейін аяқталмақ.  Нәтижесінде, 1 361 абонентке мемлекеттік желіден электр қуатын тұтуға мүмкіндік беріледі.

Бұған дейін, тариф бағасы 27-32 теңге аралығында болса, абоненттеу жұмысынан соң 17,9 теңгеге төмендейді.

Айта өтейік, Шымкенттегі  81 елді мекеннің 73-і сапалы электрмен қамтылған болса, 8 елді мекенде электр қуаты сапасыз.   Достық, Тұран, Батыс, Нұртас, Сәуле, Жаңаталап, Қайнарбұлақ, Солтүстік саяжай елді мекендерді  сапалы электр қуатымен қамту жұмыстары жоспарға сай жүруде. Бүгінге дейін, Солтүстік саяжай елді мекені мен Сәуле 276-орамда құрылыс жұмысы аяқталып, пайдалануға берілді. Қазіргі уақытта абоненттеу жұмыстары жүруде.

Жыл соңына дейін Достық, Тұран, Нұртас, Жаңаталап елді мекендерінде де құрылыс жұмыстары аяқталып, барлығы 6 елді мекен тұрғындары сапалы электр қуатымен қамтылатын болады.
Нәтижесінде,  22 мыңға жуық халық сапалы электрмен қамтылуға мүмкіндік алып, көрсеткіш 98 пайызға жетеді.