ӘКІМ КОММУНАЛДЫ-ШАРУАШЫЛЫҚ, ДЕНСАУЛЫҚ САҚТАУ, ТҰРҒЫН ҮЙ САЛАСЫ, АЗЫҚ-ТҮЛІК БАҒАСЫНЫҢ ТҰРАҚТЫЛЫҒЫНА ҚАТЫСТЫ СҰРАҚТАРҒА ЖАУАП БЕРДІ

Шымкент қаласының әкімі Мұрат Әйтенов «Instagram» желісінде тікелей эфирде халықпен жүздесіп, толғандырған сауалдарына жауап берді.Эфир барысында қала әкімі елдегі эпидемиологиялық ахуалға тоқталып, қала тұрғындарын сақтық шараларын ұмытпай, жауапкершілікті сезінуге шақырды.

— Қазір әлемде жағдай күрделі. Карантиндік талаптар жеңілдегенімен, әлі де сақтық шараларын ұмытпайық. Қалада эпидемиологиялық жағдай тұрақты. 1-27 қараша аралығында медициналық көмек шақыртулар саны 34270-ті құрады. Тәулігіне шақыртулардың орташа саны — 1318. Жедел медициналық жәрдем шақырушылар санының өсуі жоқ. Мобильді бригадалар санын 70-ке ұлғайттық. Жасанды тыныс алдыру (ИВЛ) аппараттары барлық ауруханаларға жеткізілді. Қазіргі жағдайда ол аппараты қолданып жатқан науқас жоқ. Біздің жоспар бойынша барлық ауруханалар дәрі-дәрмекпен қамтамасыз етілді. Басқа аймақтарда, көрші елдерде жағдай күрделене түсуде. Сол себепті, аса қажеттілік болмаса басқа өңірлерге шықпауға шақырамын, — деді қала әкімі.

Мемлекет басшысы Қ.Тоқаевтың «Халық үніне құлақ асатын мемлекет» тұжырымдамасына сәйкес, Шымкент қаласының әкімі Мұрат Әйтенов әр аптаның жұма күні сағат 19:00-де «Instagram» желісінде тікелей эфирге шығып, тұрғындар жолдаған сұрақтарға жауап беру дәстүрге айналған. Мұрат Дүйсенбекұлының тікелей эфиріне кез-келген адамның сұрақ жолдауына мүмкіндігі бар.

Бүгінгі эфир барысында тұрғындар тарапынан коммуналды-шаруашылық, денсаулық сақтау, тұрғын үй саласы, азық-түлік бағасының тұрақтылығына қатысты сұрақтар жолданды.Қала әкімі барлық сұрақтарға жауап беріп, тиісті сала бойынша атқарылатын жұмыстардан хабардар етті.

Атап айтқанда, шаhар басшысы коммуналдық-шаруашылық саласында техникалық-сервистік қызмет көрсету мекемелерінің жұмысын жолға қою, коммуналдық дүкен салу жобалары қарастырылып жатқанын мәлімдеді.

Шымкент қаласы әкімдігінің баспасөз қызметі