Ел президенті Қасым-Жомарт Тоқаев төтенше жағдайлардан қорғау саласында кадр дайындайтын еліміздегі жалғыз жоғары оқу орны – Азаматтық қорғау академиясына барды, деп хабарлайды “Қызмет” ақпарат агенттігі.

Мемлекет басшысы халық амандығы мен қауіпсіздігін сақтау – басты міндет әрі қастерлі парыз екенін атап өткен.

«Құтқару қызметі – өте маңызды сала. Соңғы кезде жер жүзінде төтенше оқиғалар жиілеп барады. Жұртымыз мұндай қауіп-қатерге әрдайым дайын болуы керек. Сондықтан, осы салада қызмет етіп жүрген мамандардың еңбегі еліміз үшін өте маңызды. Академия – еліміздегі кәсіби құтқарушылар даярлайтын бірден-бір оқу орны. Оны ширек ғасыр ішінде 6 мыңға жуық маман бітіріп шықты. Академия түлектері барлық облыста еңбек етіп жүр. Олар Отан алдындағы борышын адал атқарып келеді», — деген Тоқаев.

Жуырда президенттің тапсырмасымен жойқын жер сілкінісінен зардап шеккен Түркияға бір топ қазақстандық құтқарушылар мен дәрігерлер жіберілген.

«Олардың арасында Ақмола облысының мамандары да бар, яғни 18 адам. Біздің құтқарушылар бірнеше адамды аман алып шықты. Түркияда күндіз-түні жұмыс істеп жатқан азаматтарымызға алғыс айтамын! Түркиядан аман-есен оралған соң оларды міндетті түрде марапаттайтын боламыз», — деп қосты президент.

Тоқаев азаматтық қорғау жүйесі үнемі жаңғыртуды қажет ететінін атап өткен. Мемлекет басшысының сөзінше, озық әлемдік тәжірибені үлгі ету, заманауи технологияларды енгізу өте маңызды. Құтқарушыларды сапалы даярлауға ерекше назар аудару қажет.»Бұл мәселеде, әрине, командирлер мен оқытушылар негізгі рөл атқарады. Осы ретте оқу жағдайы үлкен маңызға ие. Менің тапсырмам бойынша Үкімет Академияның материалдық-техникалық базасын нығайту мәселелерін пысықтап жатыр. Жатақхана мен оқу корпусын салу жоспарланған. Жалпы, мемлекет еңбекақыны арттыру және құтқарушылардың әлеуметтік тұрғыда қамтамасыз етілуін жақсарту үшін жүйелі шаралар қабылдап жатыр», — дейді Тоқаев.

Президенттің тапсырмасына сәйкес биылдан бастап құтқарушылардың еңбекақысы 10-нан 70 пайызға дейін көтеріледі.

Тоқаев өз сөзінде өзгелерді құтқару үшін өз өмірін құрбан еткен астаналық Асқар Забикулиннің ерлігін еске алған.

«Шын мәнінде, бұл – нағыз ержүрек азаматтардың кәсібі. Төтенше жағдай мамандары жұмыс барысында талай рет ерлік көрсетті. Басқа адамдардың өміріне араша түсіп, қаза тапқан құтқарушылар аз емес. Олардың қатарында осы Академияның түлегі Асқар Забикулин де бар. «Ер есімі – ел есінде». Батырлардың ерлігі ешқашан ұмытылмауға тиіс», — деді президент.