QyzmetAqparat
Шымкент қаласындағы №1 Талант жалпы білім беру мектебінің 3 «Б» сынып оқушысы Тұрсынбек Еркеназ Айболқызы – үздік оқушылардың бірі. Ол – өз мектебінің үздігі ғана емес, түрлі байқаулардан орын алып жүрген өнерлі қыз.
Еркеназ «Ақбота» өнер орталығының би үйірмесіне қатысады. Би өнерін өте жақсы меңгерген ол бүгінде көптеген жарыстарға қатысып, жүлделі орындарға ие болып жүр. Атап айтар болсақ, Тараз қаласында өткен «Жібек жолы» атты Х республикалық балалар мен жасөспірімдер байқауына қатысып, «Хореография» номинациясы бойынша бас жүлдені қанжығаға байлады. Байқауда жеңімпаз атанған Еркеназға Түркия еліне жолдама берілді. Ал топтық би жарысынан ІІ орынды иеленген болатын.
Жүлделі жеңісімен ата-анасы мен ұстаздарын қоса қуантып жүрген Еркеназдың жетістігі мұнымен бітпейді. Түркістан қаласында өткен Халықаралық «BIG STAR» көпжанрлы фестиваль-байқауына қатысып, ол жақтан да І орынды иеленіп қайтты.
Еркеназ биді ғана емес, спортты да жаны сүйеді. Ол «Спартак» спорт кешенінен ашылған дзю-до үйірмесіне қатысып, бүгінде жүлдегерлер қатарынан көрініп жүр.
Сонымен қатар, №1 Талант жалпы білім беру мектебінің 3 «Б» сынып оқушылар арасында 8-наурыз Халықаралық аналар мен қыздар мерекесіне орай ұйымдастырылған «Өнерлі қыз, өнегелі ана» атты сайысқа Еркеназ анасы Минкан Ұлболсын екеуі қатысқан болатын. Оқушылардың ой-өрісін, тіл байлығын, ойлау қабілеттерін дамыту, ана алдындағы парызы мен қарызы туралы білім беру, балаларды анаға деген сүйіспеншілікке баулу, ана еңбегін ардақтап, мейірімділікке, сый-құрметке тәрбиелеу мақсатында ұйымдастырылған бұл жарыста қатысушылар бес кезең бойынша бақ сынасты. Алдымен таныстыру кезеңінде барлығы өз өздерін таныстырып шықты. Одан кейін «Кім тапқыр?» кезеңінде аналар қыздарымен бірігіп, сурет арқылы берілген мақалды табудан жарысқа түсті. Үшінші кезең өнер сайысы болды. Мұнда ата-аналар қыздарымен бірге өз өнерлерін ортаға салып, көрермендерге көтеріңкі көңіл-күй сыйлай білді. Төртінші кезең «Дәм думан» тағамдар сайысымен жалғасын тапса, соңғы кезеңде сән үлгілері көрсетілді.
Анасымен бірге қатысқан бұл байқауда да Аруназ ерекше көзге түсті. Өзге қатысушылардың арасынан оқ бойы озық шығып, алғырлығы мен зеректігінің арқасында тағы да бас жүлдені жеңіп алды.
Расында да, Тұрсынбек Еркеназ – сегіз қырлы, бір сырлы оқушы. Сондықтан да біз, ұстаздары Еркеназдай үлгілі әрі озат оқушымыздың болашағынан зор үміт күтеміз.
Сынып жетекшісі
Елтаева Балауса Кудербаевна
