ӨМІРГЕ ҚҰШТАР ЖАНДАР: "ЖҰЛДЫЗ БОЛЫП ЖАНАМЫЗ"

Шымкентте ерекше күтімді қажет ететін тұрғындар арасында «Біз жұлдыз болып жанамыз» атты шығармашылық кеш өтті. Онда өмірге деген құштарлығы өзгеге үлгі болып жүрген ерекше жандар өнер көрсетіп, көпшіліктің алғысына бөленді.

Кеш Шымкентте қалалық ішкі саясат және жастар істері жөніндегі басқармасы және «Халқыма тағзым» мүгедектер қоғамы» қоғамдық бірлестігінің ұйымдастыруымен көпке ұсынылды. Жастар ресурстық орталығының сахнасына мүмкіндігі шектеулі талантты жастар шығып, бар өнерін паш етті. Кеш аясында келушілер жас қолөнер шеберлерінің көрмесін де тамашалады.

Асқат Ахмеджан, №19 мүгедектерге арналған спорт мектебінің спортшысы: «Осы спорт түрімен 13 жасымнан бастап айналысып келемін. Шымкенттің атынан жарыстарға Славакияға, Америкаға бардық. Дарья Амангелдина деген тренерім болды. Сол келіп мені спортқа тартты. Содан бастап спортқа қызыға бастадым. Кейін осындай жетістікке жеттім».

Жобаның мақсаты – мүмкіндігі шектеулі жастарға кедергісіз орта қалыптастыру, өмір сүру сапасын арттыру және өмірдің барлық салаларында қызметтерге қолжетімділігін қамтамасыз ету мәселелерін шешу. Жалпы осыған дейін аталмыш іс-шаралар кешені аясында жастарға арналған арнайы мемлекеттік бағдарламалар мен кәсіпкерлікті меңгеру бойынша курстар, қаланың көрікті жерлері мен мәдени мұражайларға экскурсия жасау, үстел теннисі және шахматтан турнир және жас қолөнер шеберлерінің көрмесі өткізілген болатын.

Бүгін осы іс-шаралар қорытындыланып, жеңімпаздар мен белсенді қатысушылар марапатталды.

Жиында сөз алған Шымкент қаласы Ішкі саясат және жастар істері жөніндегі басқармасының басшысы Мұратжан Шотанов еліміздегі азаматтарды мүмкіндігі шектеулі деп бөлмей, барлығына бірдей қолдау көрсетілетінін атап өтті.

– Шымкент қаласында жастардың сапалы білім алуына, шығармашылықпен айналысып, мүмкіндіктерін толық ашуына барынша жағдай жасалып келеді. Өнер-білімге жаны құштар жастардың қоғамдық өмірге белсене араласуына осындай іс-шаралардың тигізер көмегі көп. Сонымен қатар, риясыз көңілмен өнерлерін паш еткен ерекше жастарға ризашылығымды білдіремін, — деді М.Шотанов.