ТАҒЫ 2 СПОРТ АЛАҢШАСЫН ДЕМЕУШІЛЕР САЛЫП БЕРДІ

Шымқаланың «Қала күні» мерекесіне орай Әл-Фараби ауданында демеушілер тағы 2 спорт алаңшасын пайдалануға беріп отыр. Бұл жайында аудан әкімі Р.Мыңбаев әлеужелідегі жеке парақшасында сүйінші сұрады.

Бұл спорт алаңшалары Отырар шағынауданы мен Ш.Қалдаяқов көшесі аймақтарында іске қосылып, ел игілігіне берілген. Бұл екеуін қосқанда, жеке кәсіпкер С.Төлбасовтың қоры қолдауымен жалпы саны 4 спорт алаңшасының лентасы қиылып отыр. Бұған дейін 25-ші мамырда осы ауданда 2 алаңша іске қосылса, бүгін қос спорт алаңшалары пайдалануға беріліп отыр.

Ашылу салтанатына қала әкімінің орынбасары М.Исақов, Әл-Фараби ауданының әкімі Р.Мыңбаев, С.Төлбасов қорының өкілдері А.Хегай мен Б.Сералин қатысып, тұрғындарды құттықтады. Бұл жобаның ерекшелігі, алаңқайларды демеушілер есебінен салынғанмен, тұрғындар өздері қалағанынша пайдаланып, жауапкершілігіне алады.

Аудан әкімінің дерегінше, қазіргі таңда Әл-Фараби ауданында 33 спорт алаңшасы бар. Бұған қоса, биыл қосымша 32 спорт алаңшасы жаңадан салынады деп күтілуде. Ол 32-нің 25-і әкімдік тарапынан салынса, 7-уі әкімдік пен демеуші арасында жасалған меморандумға сәйкес С.Төлбасовтың қоры есебінен салынатын болады. Ал, жалпы Шымкент қаласында алдағы уақытта аулаішілік 231 спорт алаңшасы болса, биыл 101 спорт алаңын салу жоспарланып отыр.