QyzmetAqparat
Қалалық инфрақұрылым және коммуникациялар бөлімінің ғимаратында Мәслихат хатшысы Мақсат Асылбекұлы бастаған, депутаттар Сүлеймен Тұрсымбайұлы мен Ақиқат Махмудұлы қостаған топ қоғамдық қабылдау өткізді. Депутаттар тұрғындардың өзекті мәселелерімен қатар, қаланы газбен қамту мәселесін де қарады.
Талдап тоқталар болсақ, қабылдауға келген Орынбаев Әбдінаби, Алиакбаров Серікбай және Күшікбаева Меруерттердің мәселелері бір бағытта болды. Олар ауыз су, сарқынды су және жылу мен жарық мәселесі жайын қозғады. Тұрғындар алдағы қыс мезгіліне жылыту маусымдық жұмыстары жайлы мәлімет алып, қаланы газбен қамту жұмыстарының жоғары деңгейде аяқталғанынан хабардар болды. Сонымен қатар, ауыз су және сарқынды су құбырлары тартылмаған аумақтарға қай уақытта жүргізілітені жайында жауап алды.
Тұраров Мұрат есімді азамат өзі тұрып жатқан аумақта ауыз су жүйесінің тартылмағанын және өз үйіне газ құбырын жүргізу жұмыстарының қиындық тудырып жатқанын айта келді. Нәтижесінде, Сүлеймен Тұрсымбайұлы өз қаражатынан осы азаматтың үйіне газ құбырларын жүргізіп беруді мойнына алды.
Тағы бір осындай жомарттық істің көрінісі Абдувалиев Акрамжанға да жасалды. Оған депутат Ақиқат Махмудұлы өз қаражаты есебінен газ жүйесінің сары жәшігін орнатып беруді ұсынды.
Осындай бір мәселені Атаханова Жамила да айта келді. Ол қаламыздағы көптеп ашылған демалыс орындарда адам аялдайтын орындықтарды көбейту ұсынысымен келген екен. Бұл ұсыныс та назардан тыс қалмай алдағы уақыттарда өз шешімін табатын болды.
