QyzmetAqparat
Шымкенттің туризмін дамытуға маманданған, қалаға келген туристерге бағдар беріп, қаланың имиджі үшін шаралар ұйымдастыратын «Shymkent Tourism Center» туристік ақпараттық орталығы жақында келушілерді ресми қабылдай бастамақ. Бұл туралы Шымкент қаласы әкімінің орынбасары М.Исақовтың фейсбуктегі жеке парақшасында хабарланды.
– Орталықтың негізгі мақсаты – өңірде ішкі туризмді дамытып, туристік өнімдерді ілгерілету, қаланың тұрғындары мен қонақтарына ақпараттық-анықтамалық қызмет көрсету. Жалпы орталық жыл басынан бері, яғни 1 жарым айдың ішінде ақпараттық дүңгіршектер арқылы 128 адамға ақпараттық-анықтамалық қызмет көрсетті. Оның ішінде Үндістан, Ресей, Өзбекстан сынды елдерден келген туристер бар, — дейді әкім орынбасары.
Аталған орталықта тәулік бойы туристерге арналған Call-орталық қызмет көрсетпек. Биылғы қаңтарда қала қонақтарына арналған visit-shymkent.kz порталы мен мобильді қосымшасы іске қосылған болатын. Бір айта кетерлігі, қала тұрғындары мен қонақтары бұл портал мен қосымшадан Шымкенттің көрікті жерлерімен қоса, қала аумағында өтіп жатқан кез-келген мерекелік іс-шара жайында хабардар бола алады.
С.Дүйсебайұлы
