QyzmetAqparat
Шымкентте даңқты былғары қолғап шебері, әлем чемпионы Біржан Жақыпов бас болып ашқан «Али спорт» кешенінің салтанатты тұсаукесері өтті. Белгілі спорт журналисі Ілияс Жолдастың мәлімдеуінше, «Али спорт» кешені Шымкент қаласы Еңбекші ауданының 18 шағынауданы №78а мекен жайында орналасқан.
Спорт кешені балалар мен жасөспірімдер спорт мектебі мемлекеттік-жекешелік әріптестік жобасы арқылы жүзеге асты. БЖСМ ғимараты — бір қабатты, залдағы оқу-жаттығу сабақтарында өткізу қабілеті 192 адамды құрайды:
1) Бокс – 48 адам/аптасына,
2) Кикбоксинг – 48 адам/аптасына,
3) Дзюдо – 48 адам/аптасына,
4) Джиу-джитсу – 48 адам/аптасына.
Жиынға қатысқан Еңбекші ауданының әкімі Ғалымжан Ілиясов:
— Аталған МЖӘ жобасының мақсаты — 18 шағынаудан мен Шымкент қаласының тұрғындары үшін дене шынықтырумен және спортпен айналысу үшін жағдай жасау. БЖСМ кестеге сәйкес жастар арасында кеңінен қолданылатын түрлі спорт түрлері бойынша залда күнделікті спорттық-жаттығу сабақтарын, оның ішінде олимпиадалық спорт түрлерін өткізуге арналған, — деді.
Ашылу салтанатына чемпиондар мен бапкерлер қатысып, кешеннің лентасын қиды. Олардың қатарында бапкер Мырзағали Айтжанов, Олимпиада чемпиондары Ермахан Ибраймов, Бақтияр Артаев, Серік Сәпиев, жүлдегер Мұхтархан Ділдәбеков, әлем чемпиондары Ердос Жаңабергенов, Қайрат Ералиев сынды спорт саңлақтары болды.Елімізді жұдырығымен жаһанға танытқан боксшылар, жаттығып жатқан жас спортшылармен естелік суретке түсіп, олардың спорттағы еңбектеріне табыс тіледі.
Айта кетсек, жаңадан ашылған кешеннің басшысы Жақып Байханұлы Құттыбеков деген кісі екен. Ол Біржан Жақыповтың туған әкесі. Кешенде алдағы кездері Біржанның спорт даңқына арналған мұражай ашылмақ.
