QyzmetAqparat
Ө. Жәнібеков атындағы Оңтүстік Қазақстан педагогикалық университетінің мәжіліс залында Басқарма төрағасы-ректор Гүлжан Сүгірбаева бірінші курс студенттерімен кездесті.
Кездесуге тарих және педагогика факультетінің студенттері қатысты. Жастарға алдымен ұлттың ұлы тұлғасы Өзбекәлі Жәнібеков туралы деректі фильм көрсетілді.
Бұдан кейін Гүлжан Дәулетбекқызы оқу орнын имене аттаған жастарға білім ұясында жасалатын қамқорлықтар мен міндеттер туралы кеңінен түсіндірді. Стратегиялық даму және әлеуметтік істер жөніндегі проректор Баршагүл Исабекованы, академиялық мәселелер жөніндегі проректор Айнаш Құдышеваны, ғылыми жұмыстар және инновациялар жөніндегі проректор Ержан Керімбековті және басқа да жауапты мамандарды жақыннан таныстырып, қандай да мәселелер мазаласа тікелей жолығып, шешімін табуға көмектесетінін айтты.
Университеттің академиялық саясаты туралы комплаенс-офицер Ж. Жандосова, ал студенттік ұйымдар мен үйірмелер туралы Б. Тасболат баяндама жасады.
Оқу орнының тағы бір артықшылығы, бүгінде жастардың бос уақытын тиімді ұйымдастыру және болашағына дұрыс бағыт беру мақсатында оқу орны жанында сурет, фотоөнер, би, айтыс, вокал, тағы басқа он шақты үйірме жұмыс істеп тұр. Түрік тілін оқыту орталығы да тегін сабақ үйретеді. Оқу орнының бірінші басшысы студенттерді осы мүмкіндікті тиімді пайдалануға және кез-келген уақытта жазылып, қатысуға болатынын мәлімдеді.
Ректор сондай-ақ, жастарды жат әдеттен аулақ болуға, ал Баршагүл Қашқынқызы өз кезегінде студенттерді сессия кезінде алаяқтарға алданып қалмауға шақырды. Қандай да бір келеңсіз жағдайлар болса университеттің сенім телефоны жұмыс істейтінін хабарлады. (Студенттерге арналған сенім телефоны мен үйірмелер тізімін парақшамызда қосымша жариялайтын боламыз).
Кездесу соңы ашық микрофонға ұласып, жастар өздерін толғандырған сауалдарға жауап алды. Университет басшысының студенттермен кездесуі оқу жылы бойы жалғасатын болады.
Қызмет ақпарат
