Қазіргі заманда еңбек нарығындағы өзгерістер мен мамандықтардың алуан түрлілігі балаларға ерте жастан бастап дұрыс бағыт беру қажеттілігін арттыра түседі. Мектепке дейінгі кезең – тұлғаның қызығушылығы мен қабілеттері айқындалып, болашақ кәсіби бағдардың алғашқы іргетасы қаланатын маңызды уақыт. Осы кезеңде балаларды түрлі кәсіптермен таныстыру олардың ой-өрісін кеңейтіп, еңбекке деген құрметін арттырып, болашақ мамандық таңдауға деген саналы көзқарасын қалыптастырады.
Шымкент қаласындағы №30 «Алпамыс» бөбекжай-бақшасының базасында ерте кәсіптік бағдар беру жобасы аясында «Мектепке дейінгі жастағы балаларды кәсіп әлемімен таныстырудың тиімді жолдары» тақырыбында семинар-практикум өтті. Бұл шара мектепке дейінгі ұйым педагогтарының кәсіби құзыреттілігін арттыруға және балалардың болашақ мамандықты саналы таңдауға алғашқы қадамдарын жүйелі түрде қалыптастыруға бағытталды.
Іс-шараның басты мақсаты – балабақша тәрбиеленушілерін әртүрлі мамандық түрлерімен таныстыру арқылы олардың жеке қызығушылықтары мен табиғи бейімділіктерін анықтау, сондай-ақ болашақ кәсіби бағдар беруге негіз болатын дамытушы орта құру.
Семинар барысында қатысушылар мектепке дейінгі жастағы балалардың кәсіп әлемін түсінуін жеңілдететін ойын технологиялары, рөлдік ойындар, мамандықтарға арналған бұрыштар ұйымдастыру, мамандармен кездесу сабақтарын өткізу сияқты тиімді әдіс-тәсілдерді талқылады. Сонымен қатар, педагогтар кәсіби бағдарлау жұмыстарын жүргізуге арналған жаңа әдістемелік құралдар мен интерактивті тәсілдермен бөлісті.
Іс-шараға 60 педагог қатысып, бір-бірімен тәжірибе алмасып, өз тәжірибелеріне жаңаша серпін беретін идеялар алды. Олар балалардың мамандықтарды қызығушылықпен қабылдауы үшін орта қалыптастырудың маңыздылығын атап өтті.
Семинар соңында қатысушылар практикалық жаттығуларға қатысып, кәсіпке бағыттау жұмыстарын күнделікті тәрбие үдерісіне енгізудің тиімді жолдарын талқылады. Педагогтар балалардың кәсіп әлемін ерте жастан танып-білуі шығармашылық қабілеттерінің дамуына, жауапкершілік сезімінің қалыптасуына және болашақ өмірге деген дұрыс бағдар қалыптастыруға көмектесетінін ерекше атап өтті.
Мұндай семинар-практикумдар мектепке дейінгі ұйым педагогтарының кәсіби шеберлігін арттырып қана қоймай, жас ұрпақтың болашағына бағыт беретін маңызды алаңға айналады. Ерте кәсіптік бағдар беру – баланың жан-жақты дамуы мен болашақта дұрыс мамандық таңдауына ықпал ететін өзекті бағыт.