Тіл – ұлттың алтын қазығы, рухани болмысы мен мәдениетінің жүрегі. Қазіргі заманда сауатты жазу, ана тілін жетік меңгеру тек білім көрсеткіші ғана емес, ұлттық құндылықты сақтау мен ұрпақ санасына сіңірудің маңызды тетігі болып отыр. Осы ретте Қазақстан Республикасының «Білім туралы» Заңының 5-бабы, 4-тармағына және жалпы орта білім берудің мемлекеттік стандартына сәйкес мемлекеттік тілді қолдану аясын кеңейту, оқушыларды сауатты жазуға баулу мақсатында 5–7-сынып оқушылары арасында дәстүрлі «Ұлттық диктант» байқауы өткізілді.
Байқау Шымкент қаласындағы№145 жалпы орта білім беретін мектеп базасында жоғары деңгейде ұйымдастырылды. Іс-шараға аудан мектептерінен мыңдаған оқушы қатысып, өз білімін сынға салды.
Байқаудың негізгі мақсаты – жас ұрпаққа қазақ тілінің татулық пен бірліктің тірегі, тәрбиенің бастауы және халықты біріктіретін басты құндылық екенін ұғындыру. Сонымен қатар оқушылардың сауатты жазу дағдыларын жетілдіру, тілдік мәдениетін қалыптастыру және ұқыптылыққа, жауапкершілікке тәрбиелеу болды.
«Ұлттық диктант» байқауы үш кезең бойынша жүзеге асырылды:
1. Мектепішілік кезең – бастауыш іріктеу жұмыстары жүргізіліп, оқушылардың базалық сауаттылық деңгейі анықталды.
2️. Аудандық кезең – үздік шыққан оқушылар өзара бәсекеге түсіп, жоғары деңгейдегі білімдерін көрсетті.
3️. Қалалық кезең – ең үздік оқушылардың арасында финалдық сайыс өтіп, олардың тілдік сауаттылығы жан-жақты бағаланды.
Нәтижесінде:
· Мектепішілік іріктеуден 449 оқушы аудандық кезеңге жолдама алды;
· Аудандық кезеңде 226 оқушы жүлдегер атанды;
· Қалалық кезеңге 206 оқушы қатысып, олардың 69-ы жүлделі орындарға ие болды.
Бұл нәтижелер жас ұрпақтың мемлекеттік тілге деген қызығушылығының жоғары екенін және оқушылардың сауаттылық деңгейінің артып келе жатқанын көрсетеді. Аталған шара мемлекеттік тілдің мәртебесін арттыруға, оқушылардың тілдік дағдыларын дамытып, сауатты жазу мәдениетін қалыптастыруға зор үлес қосады. Сонымен қатар, диктант байқауы балаларды ұқыптылыққа, байқағыштыққа, тіл нормаларын сақтауға және өз ана тіліне құрметпен қарауға тәрбиелейді.
«Ұлттық диктант» – жастардың тіл байлығын шыңдайтын, ұлттық құндылықтарды дәріптейтін әрі тіл мәдениетін жаңа деңгейге көтеретін маңызды білім беру алаңы. Мұндай бастамалардың тұрақты түрде өткізілуі келешек ұрпақтың тілдік құзыретін нығайтып, қоғамдағы тіл мәдениетінің дамуына серпін береді.